އޯގަސްޓް މަހު 172،000 އަށްވުރެ ގިނަ ފަތުރުވެރިން ރާއްޖެއަށް ޒިޔާރަތްކޮށްފައިވާކަމަށް ޓޫރިޒަމް މިނިސްޓްރީގެ ތަފާސްހިސާބުތަކުން ދައްކައިފިއެވެ. މިއީ ޖުލައި މަހު ޒިޔާރަތްކުރި 167،500 ފަތުރުވެރިންނާ އަޅާބަލާއިރު 3 އިންސައްތައިގެ އިތުރުވުމެކެވެ.
އާދީއްތަ ދުވަހު މިނިސްޓްރީން ނެރުނު ތަފާސްހިސާބުތަކުން ދައްކާގޮތުގައި، ފާއިތުވި އޯގަސްޓު މަހުގެ 1 އިން 30 އަށް ރާއްޖެއަށް 172،314 ފަތުރުވެރިން ޒިޔާރަތްކޮށްފައިވެއެވެ. މިއާއެކު މިއަހަރު މިހާތަނަށް ޖުމްލަ 1.35 މިލިއަން ފަތުރުވެރިން ޒިޔާރަތްކޮށްފައިވެއެވެ. މިއީ ވޭތުވެދިޔަ އަހަރުގެ އޯގަސްޓް މަހާ އަޅާބަލާއިރު 11 އިންސައްތައިގެ އިތުރުވުމެކެވެ.
2023 ވަނަ އަހަރުގެ އޯގަސްޓް މަހު 154،854 ފަތުރުވެރިން
2022 ވަނަ އަހަރުގެ އޯގަސްޓް މަހު 131،863 ފަތުރުވެރިން
މިދިޔަ މަހު އެންމެ ގިނަ ފަތުރުވެރިން ޒިޔާރަތްކޮށްފައިވަނީ އޯގަސްޓް 14 ވަނަ ދުވަހުއެވެ. އެއީ – 7،032 ފަތުރުވެރިންނެވެ. އެންމެ މަދުން 3،715 ފަތުރުވެރިން ޒިޔާރަތްކޮށްފައިވަނީ 29 ވަނަ ދުވަހުއެވެ. އެވްރެޖްކޮށް ދުވާލަކަށް 5،500 ފަތުރުވެރިން ރާއްޖެއަށް ޒިޔާރަތްކޮށްފައިވާއިރު، އެވްރެޖްކޮށް މަޑުކުރި މުއްދަތަކީ 7 ދުވަހެވެ.
އޯގަސްޓް މަހު އެންމެ ގިނަ ފަތުރުވެރިން ޒިޔާރަތްކުރި 5 ޤައުމަކީ:
ޗައިނާ: 197،326
ރަޝިޔާ: 146،243
ޔުނައިޓެޑް ކިންގްޑަމް: 117،080
އިޓަލީ: 100،874
ޖަރުމަނުވިލާތް: 95،686
ވޭތުވެދިޔަ އަހަރުގެ މި މުއްދަތުގައި އެންމެ މަތީގައި އޮތީ އިންޑިޔާއެވެ. ނަމަވެސް، ފާއިތުވި މަހު އިންޑިޔާ އޮތީ 81،000 އާ ގާތްކުރާ އަދަދަކާއެކު 6 ވަނައިގައެވެ.