ރާއްޖޭގެ އެކި ސަރަހައްދުތަކުގައި މަސްވެރިންނަށް މަސް ކިރުވުމުގައި ދިމާވެފައިވާ ދަތިތަކަށް ހައްލު ހޯދުމުގެ ގޮތުން ސަރުކާރުން ގިނަ އަދަދެއްގެ ކޯލްޑް ސްޓޯރޭޖް ފެސިލިޓީތަކެއް ގާއިމުކުރުމަށް ނިންމައިފިއެވެ.
މިގޮތުން ހއ. އިހަވަންދޫގައި 1000 ޓަނުގެ ކޯލްޑް ސްޓޯރޭޖެއް އެޅުމަށް ނިންމާފައިވާއިރު، މ. މުލަކުގައި 500 ޓަނުގެ ކޯލްޑް ސްޓޯރޭޖެއް އެޅުމުގެ އެއްބަސްވުމުގައި ސޮއިކޮށްފައިވާކަމަށް ފިޝަރީސް މިނިސްޓްރީން ވަނީ ބުނެފައެވެ. މީގެ އިތުރުން އައްޑޫ ސިޓީ ހުޅުމީދޫގައިވެސް 500 ޓަނުގެ ކޯލްޑް ސްޓޯރޭޖެއް ބިނާކުރުމަށް ވަނީ ނިންމާފައެވެ.
މ. މުލަކުގައި އެޅުމަށް ހަމަޖެހިފައިވާ ކޯލްޑް ސްޓޯރޭޖް ފެސިލިޓީ އެޅުމުގެ އެއްބަސްވުމުގައި ސޮއިކޮށްފައިވަނީ 28 އޮކްޓޯބަރ 2024 ގައެވެ. މި މަޝްރޫޢު ނިންމުމަށް 300 ދުވަސް ދީފައިވާއިރު، މުޅި މަޝްރޫޢަށް 5.188 މިލިއަން އެމެރިކާ ޑޮލަރު ޚަރަދުވާނެ ކަމަށް މިނިސްޓްރީން ލަފާކުރެއެވެ.
މި ފެސިލިޓީތަކުގެ ތެރެއިން ބައެއް ފެސިލިޓީތަކަކީ އިސްލާމިކް ޑިވެލޮޕްމަންޓް ބޭންކުގެ އެހީގައި ކުރިއަށްގެންދާ މަޝްރޫޢުތަކެކެވެ. މި ފެސިލިޓީތައް ގާއިމުކުރެވުމުން، ރާއްޖޭގެ އެކި ސަރަހައްދުތަކުގެ މަސްވެރިންނަށް މަސް ކިރުވުމުގައި ދިމާވެފައިވާ ދަތިތަކަށް ހައްލެއް ލިބިގެންދާނެ ކަމަށް ވެސް މިނިސްޓްރީން ވަނީ ބުނެފައެވެ.