މީޑިއާތަކަށް ހާއްސަ ‘މީޑިއާ ވިލެޖް’ ހިމެނޭ ގޮތަށް، އެސްޓީއޯ އިން ހަދަން ފަށައި ނުނިމި ހުރި ހުޅުމާލެ ހޮޓާ އިމާރާތުގެ މަސައްކަތް އެއްކޮށް ނިންމައި އެ ތަނުގެ ހިންގުން ވޯލްޑް އޮފް ބިޒްނަސް ޕްރައިވެޓް ލިމިޓެޑާ އެޗްޑީސީން ރޭ ހަވާލުކޮށްފި އެވެ.
ހ. މީރުމާ އިވެންޓް ހޯލުގައި ރޭ ބޭއްވި ރަސްމިއްޔާތެއްގައި އެޗްޑީސީގެ ފަރާތުން އެއްބަސްވުމުގައި ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރު އަލީ ޒުހައިރު އަދި ޑެޕިއުޓީ މެނޭޖިން ޑިރެކްޓަރު މުހައްމަދު އަސްބާހް އަލީ ނަސީރެވެ. ވޯލްޑް އޮފް ބިޒްނަސްގެ ފަރާތުން ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރު އިބްރާހީމް ނައީމް އަދި ސީއީއޯ ފަހިޔަސް ޕަންގަޓް އަދި ސީއޯއޯ އަލީ ނާހިޒެވެ.
އެޗްޑީސީން މައުލޫމާތު ދެއްވި ގޮތުގައި، ސަރުކާރުގެ ބޭނުމަށް ހާއްސަކުރާ އޮފީސް ބައެއް ހިމެނޭ ގޮތަށް ތަރައްގީކުރާ މި ހޮޓަލުގެ މަސައްކަތް ކުރިއަށްދާނީ 50 ޕަސެންޓް ފޮރިން އިންވެސްޓްމަންޓާ އެކުގައެވެ. މި މަޝްރޫއަށް އިންވެސްޓްކުރާނީ ޔޫއޭއީގެ ކުންފުންޏެއް ކަމަށްވާ ޑީޕް ސީފުޑް ކޮމްޕެނީންނެވެ. ‘މެންހަޓަން ގްރޭންޑް ހޮޓެލް’ ގެ ނަމުގައި ހިންގުމަށް ހަމަޖެހިފައިވާ މި ހޮޓަލުގައި 158 ކޮޓަރި ހިމެނޭނެއެވެ.
މި ހޮޓަލުގެ 3.5 ފަންގިފިލާ ސަރުކާރުގެ ބޭނުމަށް ހާއްސަކުރެވިފައިވާއިރު، އެ ސަރަހައްދުގައި ރައީސް މުހައްމަދު މުއިއްޒުގެ ވައުދުތަކުގެ ތެރޭގައި ހިމެނޭ މީޑިއާ ވިލެޖާއި، ގައުމިއްޔަތު އިންސްޓިޓިއުޓް އަދި އެމްއެންޔޫ މެޑިކަލް ކޮލެޖު ހިމެނޭނެއެވެ. މަސައްކަތް ފަށާތާ 9 މަސްދުވަހުގެ ތެރޭގައި ހޮޓަލުގެ ހިދުމަތް ފެށުމަށް ވަނީ ރޭވިފައެވެ.
“މިއީ، ރާއްޖެ ޒިޔާރާތްކުރާ ފަތުރުވެރިންނަށް ޓްރާންސިޓް ކުރެވޭނެ ރަނގަޅު ހޮޓަލެއް ހުޅުމާލޭގައި ތަރައްގީކުރުމަށް ރައީސް މުހައްމަދު މުއިއްޒު ވެވަޑައިގެންފައިވާ ވައުދުފުޅާ އެއްގޮތަށް، އެންމެ ޒަމާނީ ވަސީލަތްތަކާ އެކު ފެންވަރު ރަނގަޅު ހިދުމަތް ދެވޭ ގޮތަށް ތަރައްގީކުރާ އިމާރާތެކެވެ،” އެޗްޑީސީން ވިދާޅުވިއެވެ.
ފާހަގަކޮށްލެވޭ ގޮތުން، މި އިމާރާތަކީ 2011 ވަނަ އަހަރު އެސްޓީއޯއިން ހުޅުމާލޭ ފުރަތަމަ ފިޔަވަހީގައި އަޅަން ފެށި ފަސްތަރީގެ ހޮޓަލެކެވެ. މި އިމާރާތް ވިއްކާލުމަށް އެސްޓީއޯއިން ކުރިން ކުރި މަސައްކަތްތައް ކާމިޔާބު ނުވުމާ ގުޅިގެން، މިދިޔަ މޭ މަހު އެޗްޑީސީން ވަނީ ވޯލްޑް އޮފް ބިޒްނަސް ޕްރައިވެޓް ލިމިޓެޑާއެކު އެމްއޯޔޫއެއްގައި ސޮއިކޮށްފައެވެ.