ބޭންކް އޮފް މޯލްޑިވްސް (ބީއެމްއެލް) ގެ ޑެބިޓް ކާޑުތައް ބޭނުންކޮށްގެން ރާއްޖެއިން ބޭރުގައި ފައިސާ ދެއްކުމަށް ކަނޑައަޅާފައިވާ ލިމިޓް މާދަމާ އިން ފެށިގެން ބޮޑުކުރާނެ ކަމަށް ހާމަކޮށްފައެވެ. މި ބަދަލަކީ ކޮވިޑް-19ގެ ބަލިމަޑުކަމާ ގުޅިގެން ހެދި ލިމިޓްތަކަށް ލުޔެއް ދިނުމުގެ ގޮތުން ގެނައި ބަދަލެކެވެ. ކުރިން ކޮވިޑް-19ގެ ހާލަތުގައި ބޭރުގެ މުއާމަލާތްތަކަށް ބޭނުން ކުރެވެނީ މަހަކަށް 250 ޑޮލަރެވެ. އެ އަދަދު މިދިޔަ ޖުލައި މަހުން ފެށިގެން ވަނީ 500 ޑޮލަރަށް ބޮޑުކޮށްފައެވެ.
އަލަށް ގެނައި ބަދަލާއެކު، ބޭސްފަރުވާގެ ބޭނުމަށާއި ދަތުރުފަތުރުގެ ބޮޑެތި ހަރަދުތަކަށް ބޭރުގައި ހަރަދުކުރެވޭ މިންވަރު ވަނީ މަހަކު 3,000 ޑޮލަރަށް އިތުރުކޮށްފައެވެ. ބީއެމްއެލް އިން ވިދާޅުވެފައިވާ ގޮތުގައި ކަސްޓަމަރުންނަށް އެއްވެސް އެޕްލިކޭޝަނަކާ ނުލައި، މި އާ ލިމިޓްތައް ވަގުތުން ބޭނުންކުރަން ފެށޭނެއެވެ. މިއީ ރާއްޖެއިން ބޭރުގައި ދިރިއުޅޭ ދިވެހިންނަށާއި ދަތުރުފަތުރުކުރާ ފަރާތްތަކަށް ލިބިގެންދާނެ ވަރަށް ބޮޑު ލުޔެކެވެ.
މި ބަދަލުތަކުގެ އިތުރުން، ބީއެމްއެލް ކާޑު މެޝިންތަކުގައި ބޭނުންކުރާ ހުރިހާ ބީއެމްއެލް ޑެބިޓް ކާޑުތަކުން ނަގާ މާޗަންޓް ޑިސްކައުންޓް ރޭޓް (އެމްޑީއާރު) ވެސް ވަނީ ކުޑަކޮށްފައެވެ. ކުރިން %2.5 އިން ނަގަމުން އައި އެމްޑީއާރު، މިހާރު ވަނީ %1 އަށް ކުޑަކޮށްފައެވެ. މިއީ ބީއެމްއެލްގެ ތާރީހުގައި އެ ރޭޓް ކުޑަކުރި ފުރަތަމަ ފަހަރުކަން ފާހަގަކޮށްލެވެއެވެ.