މި އަހަރުގެ ދެ މިލިއަން ވަނަ ފަތުރުވެރިޔާ މިއަދު ރާއްޖެ އައިސްފިއެވެ. މި ކާމިޔާބީއާއެކު، އަހަރެއްގެ ތެރޭގައި ދެ މިލިއަން ފަތުރުވެރިން ރާއްޖެ އައިސްފައިވާ މިއީ ދެވަނަ ފަހަރެވެ. މީގެ ކުރިން މި އަދަދު ހަމަވީ ހަމައެކަނި މިދިޔަ އަހަރުގައެވެ. ދެ މިލިއަން ވަނަ ފަތުރުވެރިޔާއަށް މަރުހަބާ ކިޔުމަށް ވެލާނާ އިންޓަނޭޝަނަލް އެއާޕޯޓު (ވީއައިއޭ)ގައި ވަނީ ޚާއްސަ ރަސްމިއްޔާތެއް ބާއްވާފައެވެ.
މި އަހަރުގެ ދެ މިލިއަން ވަނަ ފަތުރުވެރިޔާއަކީ އިނގިރޭސިވިލާތަށް ނިސްބަތްވާ ބެތަނީ ސާރާ ކާސްވެލްއެވެ. އޭނާ ރާއްޖެ ޒިޔާރާތްކުރީ ފިރިމީހާއާއެކު ހަނީމޫނަށެވެ. ޓޫރިޒަމް މިނިސްޓްރީއާއި ވިޒިޓް މޯލްޑިވްސް ގުޅިގެން ބޭއްވި މި ރަސްމިއްޔާތުގައި، ބެތަނީ ސާރާ ކާސްވެލްއަށް ވަނީ ހޫނު މަރުހަބާއެއް ކިޔާފައެވެ. (ފޮޓޯ: ވިޒިޓް މޯލްޑިވްސް)
މި އަހަރު ދެ މިލިއަން ފަތުރުވެރިން ހަމަވިއިރު، ސަރުކާރުގެ އަމާޒަކީ ޖުމްލަ 2.3 މިލިއަން ފަތުރުވެރިން ރާއްޖެ ގެނައުމެވެ. މި އަމާޒަށް ވާސިލުވުމަށްޓަކައި އަދި 300،000 ފަތުރުވެރިން ރާއްޖެ ގެންނަން ޖެހެއެވެ. ޓޫރިޒަމް މިނިސްޓްރީގެ ހިސާބުތަކުން ދައްކާ ގޮތުގައި، މިހާރު ދުވާލަކު އެވްރެޖްކޮށް 6،000 ފަތުރުވެރިން ރާއްޖެ ޒިޔާރަތްކުރެއެވެ.
ފަތުރުވެރިންގެ މާކެޓުތަކަށް ބަލާއިރު، މި އަހަރު އެންމެ ގިނައިން ފަތުރުވެރިން ޒިޔާރަތްކޮށްފައި ވަނީ ޗައިނާއިންނެވެ. އެގޮތުން، ޗައިނާއިން އެކަނި 300،000 އަށް ވުރެ ގިނަ ފަތުރުވެރިން ރާއްޖެ އައިސްފައިވެއެވެ. ދެވަނައަށް އެންމެ ގިނަ ފަތުރުވެރިން އައިސްފައި ވަނީ 200،000 ފަތުރުވެރިންނާއެކު ރަޝިއާއިންނެވެ. އަދި، ތިން ވަނައަށް އެންމެ ގިނަ އަދަދަކަށް ފަތުރުވެރިން އައި ގައުމަކީ އިނގިރޭސިވިލާތެވެ. އެ ގައުމުން 177،900 އަށް ވުރެ ގިނަ ފަތުރުވެރިން ވަނީ ރާއްޖެ އައިސްފައެވެ.