ގައުމީ އެއަރލައިން މޯލްޑިވިއަނުން، ރާއްޖޭގެ އެތެރޭގެ އުދުހުންތަކުގައި ވިއްކާ ޓިކެޓްގެ އަގު އަނެއްކާވެސް ބޮޑުކޮށްފިއެވެ. މީ މިއަހަރުގެ ތެރޭގެ އެތެރޭގެ އުދުހުންތަކުގެ އަގު މޯލްޑިވިއަނުން ބޮޑު ކުރި ދެވަނަ ފަހަރެވެ.
އެގޮތުން މޯލްޑިވިއަންގެ ވެބްސައިޓުން ޓިކެޓް ވިއްކާ އަގުތަކަށް ބަލާއިރު ސެޕްޓެމްބަރު މަހުގެ އެކަކުން ފެށިގެން މާލެ ކައްދޫ އެއްކޮޅު ޓިކެޓް ވިއްކަނީ 1362 ރުފިޔާ އަށެވެ. އެހެންކަމުން މާލެ ކައްދޫ ދެކޮޅު ޓިކެޓް މިހާރު ވިއްކަނީ 2724 ރުފިއާ އަށެވެ.
ނަމަވެސް މީގެ ކުރިން ހާއްސަކޮށް މިދިޔަ ސްކޫލް ޗުއްޓީގައި މޯލްޑިވިއަން އިން މާލެ ކައްދޫ ޓިކެޓް ވިއްކާފައިވަނީ ކޮޅަކަށް 1294 ރުފިޔާ އަށެވެ. އޭރު ދެކޮޅު ޓިކެޓް ވިއްކާފައި ވަނީ 2588 ރުފިޔާ އަށެވެ.
އެހެންކަމުން ހަމައެކަނި މާލެ ކައްދޫ ދެކޮޅު ޓިކެޓުންވެސް ވަނީ 68 ރުފިޔާ ސެޕްޓެމްބަރު މަހުގެ އެކަކުން ފެށިގެން ބޮޑުކޮށްފައެވެ.
މި އަހަރު ފެށުނުއިރު ޓިކެޓް ވިއްކާފައިވަނީ 1113 އަށެވެ. މި އަހަރުގެ ފުރަތަމަ ހަމަ މަހުގެ ތެރޭ ޓިކެޓަކުން 250 ރުފިޔާވަރު ވަނީ ބޮޑުކޮށްފައެވެ.
ރައީސުލްޖުމުހޫރިއްޔާ އިބްރާހިމް މުހައްމަދު ސާލިހުގެ ރިޔާސީ ވައުދުގައި ވަނީ އެތެރޭގެ އުދުހުންތަކުގެ އަގު ކުޑަ ކުރަން ނަމަވެސް އެމަނިކުފާނުގެ ފަސް އަހަރުގެ ވެރިކަން ނިމުމަކަށް އަންނައިރު އެތެރޭގެ އުދުހުންތަކުގެ އަގު މިވަނީ އަތް ނުފޯރާ ފަށަށް ބޮޑުވެފައެވެ.