ސްކޫލަށްދާ އުމުރުގެ ކުއްޖަކު ގޭގައި ހުންނަނަމަ އެންމެ ގިނައިން އަޑުއިވޭ އެއް ވާހަކައަކީ އަތުލިޔުމުގެ ވާހަކައެވެ. ހާއްސަކޮށް އިނގިރޭސިން ލިޔަން ކުދިން ފަރިތަވެފައިވާ ދިވެހި އަތުލިޔުން ރީތި ނުވުމަކީ ގިނަ ބެލެނިވެރިންގެ ކަންބޮޑުވުމެކެވެ.
އަތުލިޔުން ރީތިކުރުމަށްޓަކައި ސްކޫލުތަކުންވެސް ކޮންމެ އަހަރަކު ގިނަ ހަރަކާތްތަކެއް ކުރިއަށް ގެންދެއެވެ. އެހެންނަމަވެސް ސްކޫލް ދައުރު ނިންމާ ކުދިންގެ ތެރެއިންވެސް އަތުލިޔުން ރީތިކޮށް ހުންނަނީ ވަރަށް މަދު ކުއްޖެއްގެ އެވެ.
މިއަދުގެ ޑިޖިޓަލް ޒަމާނުގައި ޑިޖިޓަލް ޑިވައިސްތައް ފެތުރޭ މިންވަރު އިތުރުވި ނަމަވެސް ދިރިއުޅުމުގެ އެކި ކަންކަމުގައި ރަނގަޅު ލިޔުމުގެ ހުނަރުގެ މުހިންމުކަން އަދިވެސް ދެމިއެބައޮތެވެ. ދިރާސާތަކުން ދައްކާ ގޮތުގައި ލިޔުންތެރިވުމަކީ އުނގެނުމާއި ހަނދާން ހިފެހެއްޓުން އިތުރުކޮށް، ސިކުނޑިން މައުލޫމާތު އަވަހަށް ޕްރޮސެސް ކުރުމަށް މަގުފަހިކޮށްދޭ ކަމެކެވެ. އަދި ލިޔުމުގެ ހަރުދަނާ ހުނަރުތައް އުފެއްދުމަކީ ވެސް ކޮންސެންޓްރޭޝަން ރަނގަޅުކޮށް، ބޮޑީ އެލައިންމަންޓް ރަނގަޅު ކުރުމަށް މަގުފަހިކޮށްދޭ ކަމެކެވެ.
އަތުލިޔުން ރީތި ކުރުމަށްޓަކައި ބެލެނިވެރިއެއްގެ ހައިސިއްޔަތުން ގޭތެރޭގައިވެސް ކުރެވިދާނެ ގިނަ ކަންތައްތަކެއް ހުރެއެވެ. ހަނދާން ބަހައްޓަންވީ ކުއްޖާގެ އަތުލިޔުން ރީތި ކުރުމުގެ މަސައްކަތް އެންމެ ހަނގު އުމުރުން ފެށިގެންވެސް ކުރުމަށެވެ.
ކުޅިވަރުގެ ތެރެއިން ޕްރެކްޓިސް ކުރުން
ދަރިފުޅަށް ހާއްސަ ފަންސޫރެއް ދޭށެވެ. އެ ފަންސޫރަކީ ދަރިފުޅު ގަޔާވާ ކުލަތައް ނުވަތަ ކުރެހުންތއް ހުންނަ އެއްޗަކަށް ވާންވާނެއެވެ. އަދި ކުއްޖާ ލައްވާ ލިޔުއްވާއިރު ހަމައެކަނި ބަސްތައް ކޮޕީކުރަން ދިނުމުގެ ބަދަލުގައި ވޯޑް ޕަޒްލްސް، އެނަގްރާމްސް، ހޭންގްމޭންގެ ގޭމެއް ކުޅެލެވިދާނެއެެވެ. އަދި ރީތިކޮށް ޑިޒައިންކޮށް، ގަނޑު ރީތިކޮށް ބޭއްވުމަށް ކުއްޖާއަށް ހިތްވަރު ދޭށެވެ.
ފޯކަސް ކުރުން
ފޯކަސް ކުރުމަކީ ކޮންމެހެން ކުރަން ޖެހޭ ކަމެއް ނަމަވެސް ލިޔުމުގައި އެމީހެއް އަތް ގެންގުޅޭ ގޮތާއި އާއި ޓެކްނިކަށް ސަމާލުކަން ދިނުމަކީ ވެސް ހަމަ އެހާމެ މުހިންމު ކަމެކެވެ. ލިޔާއިރު އަމިއްލަ ނަފްސާއި ދަރިފުޅު އޮބްޒާވް ކުރުމަށް ވަގުތު ނަގާށެވެ. ފަންސޫރުގައި ހިފަހައްޓައިގެން ހުންނަ ގްރިޕް ރަނގަޅުކުރުމަކީ ވަރަށް މުހިއްމު ކަމެކެވެ. އެކަށީގެންވާ ވަރަށް ވުރެ އިތުރަށް ޕްރެޝަރު ކުރުމަކީ ލިޔުމުގެ ކޮލިޓީއަށް ވަރަށް ބޮޑަށް އަސަރު ކުރާނެ ކަމެކެވެ. މި ކުދި ކުދި އެޑްޖަސްޓްމަންޓްތަކުގެ ސަބަބުން ލިޔުންތެރިކަން ރަނގަޅުކޮށްދެއެވެ.
އަތުގައި ހިފަހައްޓައިގެން ދަސްކޮށްދިނުން
ދަރިފުޅުގެ ނޯޓްފޮތުގެ ހުސް ސަފުހާތަކުގައި ލިޔެފައިވާ ލަފުޒުތައް ފެނޭހެއްޔެވެ؟ މިއީ ސްޓްރެސްގެ އަލާމާތެކެވެ. މިކަމުން އެނގެނީ ދަރިފުޅަށް ސްޓްރެސްގެ ތެރޭގައި ލިޔަމުން ގޮސް މާ ބޮޑަށް ޕްރެޝަރު ކުރާކަމެވެ. އެއީ އެކުދިންގެ ލިޔުމާއި ނަފްސާނީ ހާލަތަށް ރަނގަޅު ނޫންކަން ދައްކުވައިދޭ އަލާމާތެކެވެ.
އެހެންކަމުން ލިޔުމުގައި ދަރިފުޅަށް ރަނގަޅު ޕްރެޝަރު އެޕްލައި ކުރުމަށް އެހީތެރިވެދޭންވާނެއެވެ. އެކަމަށްޓަކައި ކުޑަކޮށް އަތުގައި ހިފަހައްޓަން ޖެހިދާނެއެވެ. ދަރިފުޅު ލިޔާއިރު އޭނާގެ އަތުގައި ހިފައި ރަނގަޅަށް ލިޔަން ކިހާ ވަރެއްގެ ޕްރެޝަރެއް ކުރަންވީކަން ދެއްކިދާނެއެވެ.
މީގެ އިތުރުން ދަރިފުޅަށް ހިތްހަމަޖެހޭ މާހައުލެއް ގާއިމުކުރާށެވެ. ލިޔުމުގައި ނުތަނަވަސްކަން އިހުސާސް ކޮށްގެން ނުވާނެ އެވެ. ސަބަބަކީ އެއީ އެމީހުންގެ ލިޔުންތެރިކަން ދައްކުވައިދޭނެ ކަމެއް ކަމަށް ވާތީ އެވެ.
ލިޔުމުގެ ސްޕީޑެއް އެކުލަވާލުން
ސްޕީޑަކީ ލިޔުމުގައި ވަރަށް މުހިންމު ކަމެކެވެ. ދަރިފުޅު މާ ބާރަށް ލިޔާނަމަ އެކުދިންގެ ކޮންޓްރޯލް ގެއްލި، އަކުރުގެ ރަނގަޅު ޝޭޕްތަކެއް ނުއުފެދުމަކީ އެކަށީގެންވާ ކަމެކެވެ. އެއާ ޚިލާފަށް ދަރިފުޅަށް މާ މަޑުމަޑުން ލިޔާނަމަ ވަގުތަށް މަސައްކަތް ނުނިންމި ކުދިން ފޫހިވާ ގޮތްވާން ފަށާނެއެވެ.
އެހެންކަމުން އެންމެ ފުރަތަމަ ދަރިފުޅަށް ލިޔުމަށް ވަގުތު ނެގުމުގެ ފުރުޞަތު ދޭންވާނެއެވެ. އެއީ ލިޔުމުގެ ކުރިން ރަނގަޅަށް ވިސްނައި، މައުލޫމާތު ޕްރޮސެސް ކުރާށެވެ.
މަޑުމަޑުން ދަރިފުޅަށް އަކުރުތައް ލިޔަން ދަސްވުމުން އެކުދިންގެ ލިޔުންތައް އަވަސްކުރުމަށް ބުނެވިދާނެއެވެ. މިސާލަކަށް ވަކި ލަފުޒުތަކެއް ލިޔުމަށް ޓައިމްލައިނެއް ދެވިދާނެއެވެ. އޭގެ ސަބަބުން އެކުދިންގެ ލިޔުމުގެ ސްޕީޑް ރަނގަޅުވެ، މޮޓޯ މޫވްމަންޓްތައް ރަނގަޅަށް ކޮންޓްރޯލް ކުރެވޭނެ އެވެ.
މައިގަނޑު މައްސަލަތައް ދެނެގަތުން
ދަރިފުޅަށް ލިޔުމުގެ ހުނަރު އިތުރުކުރުމަށް މަޖުބޫރު ނުކުރާށެވެ. އޭގެ ބަދަލުގައި ދަރިފުޅަށް ސާފު ބަސްތައް ލިޔަން އުނދަގޫވަނީ ކީއްވެކަން ދެނެގަންނަން މަސައްކަތް ކުރާށެވެ.
ކުޑަކުއްޖެއްގެ ލިޔުންތެރިކަމަށް އެތައް ސަބަބުތަކަކުން އަސަރުކޮށްފާނެއެވެ. މިސާލަކަށް ކޮންފިޑެންސް ދަށްވުމަކީ ކުއްޖާ ގޯސްކޮށް ލިޔަން މަޖުބޫރުކުރުވާ ކަމެކެވެ. ގިނަ ފަހަރަށް ކުދިން އެކުދިންގެ ލިޔުމުގެ ކުށްތައް ފޮރުވުމަށް ވެސް ހަޑި ލިޔުމެއް ބޭނުންކުރެއެވެ.
މީގެ އިތުރުން ސެންސަރީ ޑިސްއޯޑާ ހުންނަ ކުދިންނަށް ވެސް ލިޔަން އުނދަގޫވެއެވެ. މިސާލަކަށް އޯޓިސްޓިކް ސްޕެކްޓްރަމްގައި އުޅޭ ބައެއް ކުދިންނަށް ޝޭޕްތައް ދެނެގަތުމުގައި ގޮންޖެހުންތަކެއް ކުރިމަތިވެ، ލިޔުންތައް ދަށްވުމަކީ އެކަށީގެންވާ ކަމެކެވެ.
ދަރިފުޅުގެ އަތުލިޔުން ނުސާފުވަނީ ކީއްވެކަން އެނގުމުން އެކުދިންނަށް މާ ރަނގަޅަށް އެހީތެރިވެދެވިދާނެއެވެ.
ގިނައިން ފޮތް ކިޔުން
ރަނގަޅަށް ތަރުތީބުކުރެވިފައިވާ ލަފުޒުތައް ކިޔުމުން އަކުރު އުފެދުމުގައި ހުންނަ ފަރަގު ދެނެގަތުމުގައި އެހީތެރިވެދެއެވެ. ދަރިފުޅަށް އިތުރަށް ކިޔެވުމަށް ހިތްވަރުދީ އެކުދިންގެ ސަމާލުކަމާއި ޝައުގުވެރިކަން ދައްކުވައިދޭ އިންޓަރެކްޓިވް ރީޑިން މެޓީރިއަލްތައް ފޯރުކޮށްދިނުން މުހިއްމެވެ.
ފަރިތަކުރުން، ފަރިތަކުރުން، ދެންވެސް ފަރިތަކުރުން
އަތުލިޔުމަކީ ދަސްކުރުމަށް އަބަދުވެސް ޕްރެކްޓިސް ކުރަން ޖެހޭ ފަންނެކެވެ. އެހެންކަމުން ދަރިފުޅު ލައްވާ ކޮންމެ ދުވަހަކު ސަފުހާއެއް ލިޔުމަކީ ޓާގެޓަކަށް ހަދާށެވެ.
މިކަން ޝައުގުވެރިކޮށް ބެހެއްޓުމަށްޓަކައި ވެލީގައި، ބޯޑުގައި އަދި ފްރިޖުގައި ފަސޭހައިން ސާފުކުރެވޭ މާކަރުތައް ބޭނުންކޮށްގެން ލިޔެވިދާނެއެވެ. ދަރިފުޅަށް އާދަޔާ ޚިލާފަށް ލިޔުންތެރިކަމުގެ އާދަތައް ދަސްކޮށްދިނުމަށް ހިތްވަރު ދިނުމުގައި އުފެއްދުންތެރިވާށެވެ.