ކަރީނާ ކަޕޫރު ޚާން ލީޑުކުރާ ބަކިންގްހަމް މަރޑާސް ފިލްމު އިންޑިއާގެ ބޮކްސް އޮފީހުގައި ދެއްކި ފުރަތަމަ ދުވަހު 1.15 އިން 1.35 ކްރޯރު ރުފިޔާއާ ދެމެދުގެ އަދަދެއް ހޯދައިފިއެވެ. މިއާއެކު ފިލްމީ މާހިރުން ލަފާކުރާ ގޮތުގައި ބަކިންގްހަމް މަރޑާސްއަށް ބޮކްސް އޮފީހުން ފުރަތަމަ ދުވަހު ލިބުނު ނަތީޖާ ވަރަށް ދަށެވެ.
މި ފިލްމު އިންޑިއާގައި ދައްކަން ފަށާފައިވަނީ އެންމެ 700 ސްކްރީނުގައި ކަމަށްވާއިރު، ހަފްތާ ބަންދުގައި ވިޔަފާރި އިތުރުވާނެކަމަށް އުއްމީދުކުރެވެއެވެ. ހަންސަލް މެހްތާ ޑައިރެކްޓުކުރި މި ފިލްމުގެ ވިޔަފާރި ހޮނިހިރު ދުވަހު ދެގުނަވެ، ފުރަތަމަ ހަފްތާ ބަންދުގައި 6 ކްރޯރު ރުފިޔާ ހޯދުމަށް އަމާޒުކުރާނެއެވެ. އެއަށްފަހު، މި ފިލްމަށް ލިބޭ ތަރުހީބު އަންދާޒާ ކުރަން އެނގޭނީ ހޯމަ ދުވަހަށް ފަހުގައެވެ.
ބަކިންގްހަމް މަރޑާސް ފިލްމުގެ ފެށުން ދެރަވެފައިވަނީ އޭގެ ޓްރެއިލަރގެ ސަބަބުންނެވެ. އެއީ ސީދާ ޑިޖިޓަލް ޕްލެޓްފޯމަށް ނެރޭ އުފެއްދުމެއްގެ ގޮތުގައި ފެނުނު ޓްރެއިލަރެކެވެ. ފެށުނީއްސުރެ މި ފިލްމަކީ ދެރަ އުފެއްދުމެއްގެ ގޮތުގައި ފެނުނު ނަމަވެސް، ކަރީނާ ކަޕޫރުގެ ބައިވެރިވުމުގެ ސަބަބުން ވިޔަފާރި 1 ކްރޯރު ރުފިޔާއަށްވުރެ މަތިވެފައިވެއެވެ.
މި ފިލްމުގެ ފެށުން ފެއިލްވެފައި ވީ ނަމަވެސް، މި ފިލްމުގެ ދައުރު ނިމޭއިރު އަގުހިފަހައްޓާލެވޭވަރުގެ ނަތީޖާއެއް ހޯދޭތޯ ބަލަންޖެހެއެވެ.