އިންޑިއާގެ ކުރީގެ ފިލްމީތަރި ސަނާ ޚާން އަދި އޭނާގެ ފިރިމީހާ އަނަސް ސައިޔަދު ދެވަނަ ދަރިފުޅަކަށް އިންތިޒާރުކުރަމުންދާކަން އިއުލާނުކޮށްފިއެވެ. މި އުފާވެރި ޚަބަރު އެ ދެމަފިރިން ހިއްސާކޮށްފައިވަނީ ހުކުރު ދުވަހު އިންސްޓަގްރާމްގައި ޕޯސްޓެއް ކުރުމަށްފަހުއެވެ.
ސަނާ ޚާން އަދި އަނަސް ސައިޔަދުގެ ފުރަތަމަ ދަރިފުޅު، އުފަންވެފައިވަނީ 2023 ވަނަ އަހަރުގެ ޖުލައި 5 ވަނަ ދުވަހުއެވެ. ސަނާ ޚާން ވަނީ އަނަސް ސައިޔަދާ ކައިވެނިކުރުމުގެ ކުރިން އޭނާގެ އެކްޓިންގ ކެރިއަރ ދޫކޮށްލާފައެވެ. އެ ދެމަފިރިންގެ މިވަގުތު ހުރީ ފިރިހެން ދަރިއެކެވެ.
އިންސްޓަގްރާމްގައި ޕޯސްޓްކޮށްފައިވާ ފޮޓޯއެއްގައި ކުޑަ ފިރިހެން ކުއްޖަކު ތަޅުންގަނޑުގައި އިށީނދެ އިންއިރު، އޭނާގެ ކުރިމަތީގައި ކުޑަ ކުއްޖަކު ހުރި މަންޒަރު ފެނެއެވެ. މި ފޮޓޯގައި “އަލްޙަމްދުލިއްލާހް! އަޅުގަނޑުމެންގެ ތިން މެންބަރުންގެ ޢާއިލާ ހަތަރު މެންބަރުންނަށް އުފަލާއެކު ބޮޑުވަމުންދަނީ. ކުޑަ ނިޢުމަތެއް އައުމުގެ މަގުމަތީގައި. ސައިޔަދު ތާރިޤު ޖަމީލް ބޮޑު ބޭބެއަކަށް ޝައުޤުވެރިވެފައި.” މިފަދައިން ލިޔެފައިވެއެވެ.
ސަނާ ޚާން އެންމެ މަޝްހޫރުވެފައިވަނީ ބިގް ބޮސް 6 ގައި ބައިވެރިވުމާއި ސަލްމާން ޚާންގެ ފިލްމު “ޖައި ހޯ” ގައި ތަމްސީލުކުރުމުންނެވެ.
މި އުފާވެރި ޚަބަރާ ގުޅިގެން ގިނަ ބަޔަކު ވަނީ އެ ދެ މަފިރިންނަށް މަރުހަބާ ކިޔާފައެވެ،.