މި ދުވަސްވަރަކީ އަގުބޮޑެތި ހަދިޔާތަކާއި ބޮޑެތި ސަޕްރައިޒްތައް ސޯޝަލް މީޑިއާގައި ފެންނަމުންދާ ދުވަސްވަރެއް ނަމަވެސް، މަހާރާޝްޓްރާގައި ހިނގައިދިޔަ ހިތްގައިމު މި ހާދިސާ ވަނީ މިލިއަނަށްވުރެ ގިނަ ބައެއްގެ ހިތްތައް އަތުލާފައެވެ. 93 އަހަރުގެ ފިރިހެނެއް އޭނާގެ އަނބިމީހާއާއެކު ރަން ފިހާރައަކަށް ވަދެ، އޭނާގެ ރައްކާކުރި ފައިސާއިން އަނބިމީހާއަށް މަންގަލްސޫތުރާ (އިންޑިއާގައި ކައިވެނިކޮށްގެން އުޅޭ އަންހެނުން އަޅާ ފަށެއް) ވިއްކުމަށް އެދުނެވެ.
ނިވްރުތީ ޝިންޑެ އާއި އޭނާގެ އަނބިމީހާ ޝާންތަބާއީ، ދެމަފިރިން 90 އަހަރުގެ އުމުރުގައި، އަޝާދީ އެކާދަޝީ ފެސްޓިވަލްއަށް ޕަންދަރްޕޫރަށް ވަނީ ދަތުރުކޮށްފައެވެ. އޮންލައިން މީޑިއާ ރިޕޯޓުތަކުން ދައްކާގޮތުގައި، ޖަލްނާ ޑިސްޓްރިކްޓްގެ އަމްބޯރާ ޖަހަގީރު ރަށުން އައި މި ދެމަފިރިން ވަނީ ގިނަ އަހަރުތަކެއް ވަންދެން މިގޮތަށް މި ދަތުރުކޮށްފައެވެ.
ދަތުރުމަތީގައި މި ދެމަފިރިން ރަން ފިހާރައަކަށް ވަދެއެވެ. އޭރު އާދައިގެ ހެދުމެއް ލައިގެން ހުރި ނިވްރުތީ އަތުގައި 1,120 ރުޕީސް އޮތެވެ. މިއީ އޭނާގެ އަނބިމީހާއަށް މަންގަލްސޫތުރާއެއް ގަތުމަށް ރައްކާކޮށްފައި ހުރި ފައިސާއެވެ. މިއީ އަގުބޮޑު އެއްޗެއް ގަތުމުގެ ވިސްނުމެއް ނޫނެވެ. އެހެނަސް އޭނާގެ ލޯބި އަދި އިހްތިރާމް ދެއްކުމުގެ ގޮތުންނެވެ.
“ދެމަފިރިން ފިހާރައަށް ވަދެ، ފިރިހެން މީހާ އަހަންނަށް 1,120 ރުޕީސް ދިނުމަށްފަހު، އޭނާގެ އަނބިމީހާއަށް މަންގަލްސޫތުރާއެއް ގަންނަން ބޭނުންވާ ކަމަށް ބުނި. އަހަރެން އެ މަންޒަރުން ވަރަށް ބޮޑަށް ޖަޒުބާތުވެ، އެ ފައިސާއިން އަހަރެން ނެގީ ހަމައެކަނި 20 ރުޕީސް، އެއީ ބަރަކާތެއްގެ ގޮތުގައި، އަދި މަންގަލްސޫތުރާ އެ ދެމަފިރިންނާ ހަވާލުކުރިން.” މިންޓް އާ ހަވާލާދީ ފިހާރައިގެ ވެރިފަރާތުން ބުންޏެވެ.
މި ހިތްގައިމު ހާދިސާއިން ދައްކުވައިދެނީ ލޯބީގެ އަގަކީ ފައިސާގެ އަގު ނޫންކަމާއި، އުމުރުން ދުވަސްވީ ނަމަވެސް ލޯބި ދެމެހެއްޓުމުގެ މުހިންމުކަމެވެ. މި ދެމަފިރިންގެ ވާހަކަ ސޯޝަލް މީޑިއާގައި ވައިރަލްވެ، ގިނަ ބައެއްގެ ހިތްތައް ވަނީ އަތުލާފައެވެ.