ލިޔުނީ: އަންޖުމް އިސްމާއިލް މުހައްމަދު
ބަނޑުހައި ހޫނުކަމުގައި މިވަނީ ދެވައްތަރެއްކަން އެނގިލައްވާތޯއެވެ؟ އެއީ ޖިސްމާނީގޮތުން ވާ ހައިހޫނުކަމާއި ޖަޒުބާތީގޮތުން ތިމާއަށް އިޙްސާސުވާ ހައިކަމެވެ. މިއީ އަޅުގަނޑަށް މިއަދު އަލަށް ދިރާސާކޮށްލެވުނު މަޢުލޫއެއްކަމުން މިކަމުގެ ވާނުވާ ޙިއްސާކޮށްލާނަމެވެ. އެއަށްފަހު ތިބާއަށް އެންމެ ގިނައިން އިޙްސާސް ވަނީ މިތަނުން ކޮން ވައްތަރެއްގެ ބަނޑުހައިވުމެއްތޯ އަމިއްލަ ނަފްސާއި ސުވާލުކޮށްލަންވާނެއެވެ.
ޖިސްމާނީ ގޮތުން ބަނޑުހައިވުމަކީ، ގިނައިރު ނުކައި ހުރުމުގެ ސަބަބުން ތިބާގެ ހަށިގަނޑަށް ކުރާ ވޭނީ އިޙްސާސެވެ. މި ހައިހޫނުކަމުގެ ސަބަބުން ބަނޑުގައި ރިހޭ ގޮތްވެ، މީހާ ނުތަނަވަސްވެ، ބަނޑުން ޒާތްޒާތުގެ އަޑުތަށް ގޮވާތަން އާދެއެވެ. ބައެއްފަހަރު ތަފާތު ހޫނުކަމެއްވެސް ބަނޑުގެ މެދުން މައްޗަށް އަރާހެންވެސް ހީވެދާނެއެވެ. މި އިޙްސާސަކީ ނުކައި ހޭދަވާ ވަޤުތު އިތުރުވީވީނުން އެ ހައިކަންވެސް އިތުރުވާ ފަދަ ކަމެކެވެ. އަދި ކަނީ ކޯއްޗެއްތޯ ބެލުމަށްވުރެ މުހިތްމުވެގެންދަނީ އެ ހައިކަން ފިލުވުމެވެ. މި ދަންނަވަނީ ޙަލާލު ރިޒުގުގެ ތެރެއިން ކޮންމެ އެއްޗެއްވެސް ކާން ތިމާމީހާގެ ސިކުނޑި ހުޅުވިފައިހުންނަ ވާހަކައެވެ. އަދި ކެއުމުގެ ލައްޒަތާއިއެކު މި ހައިހޫނުކަމުގެ އިޙްސާސް ފިލައިގެންދާނެއެވެ.
ޖަޒުބާތީ ގޮތުން ބަނޑުހައިވުމަކީ، ކުރިން ދެންނެވުނު ގޮތާއި ޚިލާފަށް ކޮންމެވެސް ނާޒުކު އިޙްސާސަކާއި ހުރެ އިޙްސާސްވާ ބަނޑުހައިވުމެވެ. މިސާލަކަށް، މާއޫސްވުމުގެ ސަބަބުން، ހިތްހަމަ ނުޖެހުމުގެ ސަބަބުން، ފޫހިވުމުގެ ސަބަބުން ނުވަތަ އެކަނިވެރިކަން އިޙްސާސްވުމުގެ ސަބަބުން އެއްޗެއް ކާލަން ބޭނުންވުމެވެ. ލައްބަ، މި ދަންނަވަނީ “ކްރޭވިންގްސް”ގެ ވާހަކައެވެ. މިކަމަށް އެއްވެސް ޖިސްމާނީ ނިޝާންތަކެއް އެކުލެވިފައެއް ނުވެއެވެ. މިފަދަ ހައިކަމެއް އިޙްސާސްވާނީ ކުއްލިއަކަށް އަދި އެވަޤުތުގައި ވަކި ޚާއްސަ އެއްޗެއް ކާހިތްވާތަން އާދެއެވެ. މިސާލަކަށް ފޮނި އެއްޗެއް، ނުވަތަ ކުޅި އެއްޗެއް ނުވަތަ ފިނި އެއްޗެއް މިހެން ގޮސް ކޮންމެވެސް ތަފާތު ތަޖުރިބާއެއް ކޮށްލަންވެސް ބޭނުންވެދާނެއެވެ.
ޖިސްމާނީ ހައިހޫނުކަމާއި ތަފާތު މި ހައިކަމަކީ ހަމައެކަނި ހިތާއި ސިކުނޑީގެ ކުޅިވަރެކެވެ. އަދި ގިނަފަހަރަށް ކަވައިގަންނަނީ ހަށިގަނޑަށް ގެއްލުން ހުންނަ ޒާތުގެ ކާނާއެވެ. ފޮނިކާއެއްޗިއްސާއި ތެލުލި އެއްޗިއްސެވެ. ނުވަތަ ހަކުރު ގިނައިން އެކުލެވޭ ބުއިންތަކާއި ތައްޔާރީ ކާނާއެވެ. މިގޮތަށް އެމީހަކު އެންމެ ގިނައިން ކާހިތްވަނީ ކޯއްޗެއްކަން އެނގޭނީ ހަމަ އެމީހަކަށެވެ. ނަމަވެސް ލިބިގެންދާ ހިތްހަމަޖެހުމަށްވުރެ އިތުރުވެގެންދަނީ ތިމާމީހާގެ ބަރުދަނެވެ. އަދި މިތަކެއްޗަކީ ގިނައިން ކެއުމުގެ ސަބަބުން ކޮލެސްޓްރޯލާއި ކާޑުގެ ބަލިތަށް ހައްދުން މައްޗަށް ދާފަދަ އެއްޗިއްސެވެ.
އެހެންކަމުން މިފަދަ ޖަޒުބާތީ ބަނޑުހައިހޫނުކަމަށް ކޮންމެފަހަރަކު ގޮތްދޫކޮށްލުމަކީ ހަށިގަނޑަށް ދެވޭ ބޮޑުގޯހެއްކަމަށް ސިއްޙީ މާހިރުން އެއްބަސްވެއެވެ. މި އިޙްސާސްތަށް ކޮންޓްރޯލް ކުރުމަކީ ދުޅަހެޔޮ ސިއްޙަތަކަށްޓަކައި އަގުވަޒަން ކުރެވޭވަރުގެ ޤުރުބާނީއަކަށް ވެގެންދާނޭފަދަ ކަމެކެވެ. ތެދުތެދަށް ބުނާނަމަ މިކެއުންތަށް ކެއުމަށްފަހު ކިރާމެޝިނުން ދައްކާ ޢަދަދާއި މެދު ހިތާމަކުރަންޖެހޭ ފަހަރުވެސް އާދޭތާއެވެ.
ހުރެލާފަ މީރު އެއްޗެއް ކާލުމަކުން މައްސަލައެއްނެތެވެ. މައްސަލައަކަށް ވެގެންދަނީ އެކަން އާދައަކަށް ވާހިސާބުންނެވެ.