މޯލްޑިވިއަން ޑިމޮކްރަޓިކް ޕާޓީ އެމްޑީޕީގެ ރިޔާސީ ޓިކެޓް ރައީސުލްޖުމުހޫރިއްޔާ އިބްރާހިމް މުހައްމަދު ސާލިހަށް އަރުވައިފިއެވެ.
އެމްޑީޕީގެ ރިޔާސީ ޓިކެޓު ރައީސް ސާލިހަށް އަރުވާފައިވަނީ އެކަމަށް ރޭ އަލިމަސް ކާނިވަލުގައި ބޭއްވި ޚާއްޞަ ރަސްމިއްޔާތެއްގައެވެ. މި ރަސްމިއްޔާތަށް އެމްޑީޕީގެ ކޮންގުރެސްގެ ހުރިހާ މެންބަރުންގެ އިތުރުން ރާއްޖޭގެ ހުރިހާ ރަށަކުން މީހުން ގެނެސްފައިވެއެވެ.
ރައީސް ސާލިހަށް ޓިކެޓް ހަވާލުކުރީ އެމްޑީޕީގެ ޗެއަރޕާސަން ފައްޔާޒު އިސްމާއިލްއެވެ.
ރައީސް ސާލިހަށް ޓިކެޓް ހަވާލުކުރަން ރޭ ބޭއްވި ހާއްސަ ޖަލްސާގައި އެޕާޓީގެ ރައީސް މުހައްމަދު ނަޝީދު ބައިވެރިވެވަޑައެއް ނުގަންނަވައެވެ.
ރިޔާސީ އިންތިހާބުގައި ވާދަކުރައްވާނެ ބޭފުޅަކު ހޮވަން މިދިޔަ މަހުގެ 28ގައި ބޭއްވި ރިޔާސީ ޕްރައިމަރީގެ ނަތީޖާ ގަބޫލު ނުކުރައްވާ ކަމަށް ނަޝީދުގެ ފެކްޝަނުން ދަނީ ހާމަކުރަމުންނެވެ.