މި އަހަރުގެ އޭޕްރީލް މަހު ބާއްވާ މަތީ ސާނަވީ (އެޗް.އެސް.ސީ) އިމްތިޙާނުގެ ޖަވާބު ކަރުދާސް މާކުކުރާނެ މާކަރުން ހޯދަން އިއުލާންކޮށްފިއެވެ.
ޑިޕާޓްމަންޓް އޮފް ޕަބްލިކް އެގްޒެމިނޭޝަނުން ވަނީ ދިވެހި މާއްދާއަށް ދެ މާކަރުން އަދި އިސްލާމް މާއްދާއަށް 1 މާކަރު ހޯދަން އިއުލާނުކޮށްފައެވެ.
މި މަސައްކަތް ކުރިއަށް ދާނެ ތާރީޚްގެ ގޮތުގައި ބުނެފައިވަނީ 24 އެޕްރީލް އިން 29 އެޕްރީލްގެ މެންދުރު ފަހު 13:00 އިން ހަވީރު 17:00 އަށެވެ.
ޑީޕީއީން އިތުރަށް ބުނީ މާކަރުންނަށް ކަނޑައެޅިފައިވަނީ މާކުކުރާ ކޮންމެ ކަރުދާހަކަށް 60 ރުފިޔާ ކަމަށާއި މާކިންގ މަސައްކަތް ވޭތުވެދިޔަ 5 އަހަރުގެ ތެރެއިން 3 އަހަރު ކޮށްފައިވާނަމަ، ކޮންޓިނިއުޓީ އެލަވަންސްގެ ގޮތުގައި 1000 ރުފިޔާ ދޭނެ ކަމަށެވެ.
މާކަރަކަށް ހުށަހަޅާ ފަރާތެއްގެ ޝަރުތުތަކުގެ ތެރޭގައި މާއްދާއަށް ޚާއްޞަކުރެވިފައިވާ ދާއިރާއަކުން ދިވެހިރާއްޖޭގެ ޤައުމީ ސަނަދުގެ އޮނިގަނޑު ލެވެލް 5 ނުވަތަ އެއަށްވުރެ މަތީ ސަނަދެއް ޙާޞިލްކޮށްފައިވުން،
ސާނަވީ / މަތީ ސާނަވީ ސިލަބަހަށް 2 އަހަރު ދުވަހު ކިޔަވައިދިނުމުގެ ތަޖުތިބާ ލިބިފައިވުން ނުވަތަ ވޭތުވެދިޔަ ދެ އަހަރު (މެދުނުކެނޑި) މާކުކުރަން އެދޭ މާއްދާގެ އިމްތިޙާނު މާކުކޮށްފައިވުން ހިމެނެއެވެ.