މާދަމާ އުމްރާއަށް ގިނަ ބަޔަކު ފުރާތީއާއި ގިނަ އަދަދެއްގެ ހައްޖުވެރިން އައުމަށް ހަމަޖެހިފައިވާތީ އެއާޕޯޓުން ހިދުމަތް ހޯދާ ފަރާތްތަކުން ވަގުތު އޮއްވާ ފުރުމުގެ އިންތިޒާމުތައް ހަމަޖެއްސުމަށް އިލްތިމާސް ކޮށްފިއެވެ.
ފުލުހުން ބުނީ މާދަމާގެ 12:00 އިން ފެށިގެން ހަވީރު 04:00 އާ ދެމެދު ގިނަ އަދަދެއްގެ ބަޔަކު އުމްރާގެ އަޅުކަމަށް ފުރުމަށް ހަމަޖެހިފައިވާތީއާއި ގިނަ އަދަދެއްގެ ހައްޖުވެރިން ރާއްޖެ އައުމަށް ހަމަޖެހިފައިވާތީ ވެލާނާ އިންޓަނޭޝަނަލް އެއާޕޯޓުގެ ޓްރެފިކް ތޮއްޖެހުން ބޮޑުވާނެ ކަމަށް ބެލެވޭ ކަމަށެވެ.
އެހެންކަމުން، ދަތުރުކުރެއްވުމުގެ އެންމެހާ ކަންކަން އޮމާންކަމާއެކު ދާނެކަން ކަށަވަރު ކުރުމަށް، އެއާޕޯޓުން ހިދުމަތް ހޯދާ ފަރާތްތަކުން ވަގުތު އޮއްވާ ފުރުމުގެ އިންތިޒާމުތައް ހަމަޖެއްސުމަށް ފުލުހުން ވަނީ އެދިފައެވެ.
ފުލުހުން އިތުރަށް ބުނީ، އެއާޕޯޓުގައި އޮމާންކަމާއެކު ޓްރެފިކް ފްލޯ ކުރިއަށްދާނެކަން ކަށަވަރުކުރުމަށްޓަކައި އިތުރު ފުލުހުން ހިދުމަތުގައި އެއާޕޯޓުގައި ހަރަކާތްތެރިވަމުންދާނެ ކަމަށެވެ. އެއާޕޯޓަށް އަންނަ ފަރާތްތަކުން ފުލުހުންގެ އިރުޝާދުތަކާ އެއްގޮތަށް އަމަލުކުރުމަށް ފުލުހުން ވަނީ ބުނެފައެވެ.