ނ އަތޮޅުގެ ރަށްތަކަށް އުއްމީދީ ގިނަ ވައުދުތަކެއް، އެއްވެސް ރަށެއް ބާކީއެއް ނުވާނެ: ޑރ މުއިއްޒު

ރިޔާސީ ކެމްޕެއިނުގައި ޑރ މުއިއްޒު ނ އަތޮޅުގެ ރަށްތަކަށް ވަޑައިގެން އުއްމީދީ ގިނަ ވައުދުތަކެއް ވެވަޑައިގެންފިއެވެ.
އިދިކޮޅުގެ ރިޔާސީ ކެންޑިޑޭޓު ޑރ މުހައްމަދު މުއިއްޒު މިއަދު އެންމެ ފުރަތަމަ ވަޑައިގަތީ ނ ކެނދިކުޅުދޫ އަށެވެ. އެގޮތުން އެ ރަށުގެ ރައްޔިތުންނާއި ބައްދަލުކުރައްވާ ޑރ މުއިއްޒު ވިދާޅުވީ ރަށުގެ ތަރައްގީ އާއި ނ އަތޮޅުގެ ތަރައްގީއަށްޓަކައި ކަންކަން ކުރަން ވަރަށް ގިނަ ރައްޔިތުން ބޭނުންވާނެ ކަަމަށާއި ބޭނުންވާން ޖެހޭނެ ކަަމަށެވެ.
“ ރައްޔިތުންނަށް ތަރައްގީ ގެނެސްދިނުމަށް، ރައްޔިތުންނަށް ދަތިވެފައި ހުންނަ ކަންކަން ކުރަން ވޯޓުލައިގެން މި އިންތިހާބު ކުރަނީ ސަރުކާރަށް، ފަސް އަހަރެއް ވެގެން ދާއިރު ރައްޔިތުންނަށް ބޭނުންވާ ކަންކަން ނުކޮށްދިނުމުން އެ ސަރުކާރެއް ވަނީ ފެއިލްވެފައި. ދެން ރައްޔިތުންނަށް އަނެއްކާވެސް ގޮތެއް ނިންމަން ފުރުސަތު ލިބެނީ، ލިބޭއިރު ރައްޔިތުން ވިސްނަވަން ވާނެ.” ޑރ.މުއިއްޒު ވިދާޅުވިއެވެ.

ކެނދިކުޅުދޫ ފަދަ ދިގު ރަށެއްގައި އެންމެ ބަނދަރެއް އޮތުމަކީ ގިނަ ދަތިތަކާ ކުރިމަތިވާނެ ކަމެއް ކަމަށެވެ. އޭގެ ބަދަލުގައި ކެނދިކުޅުދޫގެ ކުޅުދޫ އަވަށާއި ކެނދިކޮޅު އަވަށުގައި ވަކިން ދެ ބަނދަރު އޮންނަން ޖެހޭ ކަމަށް މުއިއްޒު ވިދާޅުވި އެވެ.
އެހެންކަމުން އެކަން ހައްލުކުރުމަށް އޭނާގެ ވެރިކަމެއްގައި ކެނދިކުޅުދޫގައި އިތުރު ބަނދަރެއް ތަރައްގީކޮށް، ދެ އަވަށުގައި ބަނދަރު އޮންނަ ގޮތަށް ހަދާނެ ކަމަށް މުއިއްޒު ވިދާޅުވި އެވެ.
އޭގެ އިތުރުން ކެނދިކުޅުދޫއަކީ ގުދުރަތީ ރީތިކަން ލިބިފައިވާ ރަށެއްކަން ފާހަގަކޮށް މުއިއްޒު ވިދާޅުވީ އެރަށުގައި އިކޯ ޓޫރިޒަމް ތަރައްގީކުރާނެ ކަމަށެވެ. އެ މަޝްރޫއު ހިންގާނީ މުއިއްޒު ވިދާޅުވި ގޮތުގައި ޒުވާނުންނަށް އިންވެސްޓް ކުރެވޭ ގޮތަށެވެ.