މިއަދު ހަވީރު އިދިކޮޅު ޕީޕީއެމް/ ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒު ބ. އޭދަފުއްޓަށް ވަޑައިގަތުމުން ގިނަ ބަޔަކު ނިކުމެ ތަފާތު މަރުހަބާއެއް ކިޔައިފިއެވެ.
އެގޮތުން މުއިއްޒު އިންނެވި ލޯންޗުކޮޅު އޭދަފުށީ ބަނދަރު ނެރުން ވަދެގެން އައި އިިރު އެންމެ ފުރަތަމަ މަރުހަބާ ކީ، ބޮއްކުރައެއްގައި އަންހެންވެރިންގެ ކުރުފަލީގެ ހަރަކާތަކުންނެވެ. މުއިއްޒުގެ ކެމްޕެއިން ލަވަޔަށް ކުރުފަލި ޖަހައި ލޯންޗުގެ ކުރިން އެ ބޮއްކުރާ ދުއްވަމުން ދިޔަ އެވެ.
ރަށުގެ ބަނދަރަށް ޑރ. މުއިއްޒު އަރާ ވަޑައިގެންނެވި އިރު މަރުހަބާ ކިޔަން ބަނދަރު ސަރަހައްދަށް އެތައް ސަތޭކަ ރައްޔިތުންނެއް އެއްވެފައި ތިއްބެވެ.
އެ އެންމެންގެ މޫނުމަތިން ފެންނަމުން ދިޔައީ އުފާވެރިކަމާއި ޖޯޝެވެ. އެންމެން އެއް އަޑަކުން މެދު ނުކެނޑި ގޮވަމުން ދިޔައީ “ޑރ. މުއިއްޒު އެއްބުރުން” ނެވެ.
ބަނދަރަށް ޑރ. މުއިއްޒު ފައިބާ ވަޑައިގަތުމުން ގެންނެވީ ހަތްކޮޅު ދަށުގަ އެވެ.
މާބޮނޑިއާއެކު މާފާތިތައް އިދިކޮޅުގެ ކެންޑިޑޭޓުގެ ކަރުގައި އެޅުވި އެވެ.
ރިޔާސީ އިންތިހާބުގެ ކެމްޕެއިނަށް ރ. އަތޮޅުގެ ބައެއް ރަށްތަކަށް ވަޑައިގަތުމަށްފަހު މިއަދު ޑރ. މުއިއްޒު ވަނީ ބ. އަތޮޅު ކުޑަރިކިލާއި ކެންދޫ އަދި މާޅޮހަށް ވަޑައިގެންފަ އެވެ.
މިއަދު ހަވީރު އޭދަފުއްޓަށް ވަޑައިގަތުމަށްފަހު، އެރަށުގައި މިރޭގައި ބޮޑު ޖަލްސާއެއް ބޭއްވުމަށް ވަނީ ހަމަޖެހިފަ އެވެ. ބ. އަތޮޅަށްފަހު މާދަން ޑރ. މުއިއްޒު ކެމްޕެއިންއަށް ވަޑައިގަންނަވާނީ ޅ. އަތޮޅަށެވެ.