މި ޤައުމުގެ މިނިވަންކަން ޙިމާޔަތްކޮށް ބާރު ސްޕީޑްގައި ތަރައްޤީ ގެނެސް ދޭނެ ކަމަށާއި އެކަން ކުރާނީ ހުރިހާ ރަށްތަކެއްގެ ރައްޔިތުންގެ ބައިވެރިވުމާއި ޚިޔާލާއި މަޝްވަރާގެ ތެރެއިން ފުރިހަމަ ބައިވެރިވުން އޮވެގެން ކަމަށް އިދިކޮޅު ކޯލިޝަނުގެ ރިޔާސީ ކެންޑިޑޭޓު ޑރ މުހައްމަދު މުއިއްޒު ވިދާޅުވެއްޖެއެވެ.
ކުޅުދުއްފުށީގައި ރޭ ބޭއްވި ޖަލްސާގައި ޑރ މުއިއްޒު ވިދާޅުވީ،
ރާއްޖޭގެ ތަރައްޤީ ބައްޓަން ކުރާނީ ޤާނޫނީ ބާރުވެރިކަން ދީގެން އުފެއްދޭ ނޭޝަނަލް ޑިވެލޮޕްމަންޓް ޕޭލަނަކުން ކަމަށެވެ.
އެގޮތުން ހއ،ހދ އަދި ށ ތިން އަތޮޅު ހިމެނޭ ގޮތަށް، ގުޅި ލާމެހިފައިވާ އިންޓަރގްރޭޓެޑް ޑިވެލޮޕްމަންޓް ކުރިއަށް ގެންދާ ގޮތަށް ވާނީ ރާވާފައި ކަމަށާއި މި ސަރަޙައްދުގެ މައި މަރުކަޒަކީ ކުޅުދުއްފުށި ކަމަށް ޑރ މުއިއްޒު ވިދާޅުވިއެވެ.
“ މި މައި މަރުކަޒުގައި ހުންނަންޖެހޭނެ ކަމަށް އެ ތަޞައްވުރުގައި ބުނާ އެންމެހައި ކަންކަމެއް ޙަޤީގަތަކަށް ހަދައިދިނުމަކީ އަޅުގަނޑުމެންގެ ޕްލޭން. ރާއްޖެއަށް އެންމެ މުހިންމު މައްސަލައަކީ ގެދޮރުވެރިކަމުގެ މައްސަލަ. އަޅުގަނޑުމެން އެންމެ ބޮޑު އިސްކަމެއް ދޭނީ ގެދޮރުވެރިކަމުގެ މައްސަލައަށް ޙައްލެއް ހޯދައިދިނުމަށް. މުޖްތަމަޢުގައި ހުރި ހުރިހާ އިޖްތިމާޢީ މައްސަލަތަކެއް ޙައްލުވާނީ ގެދޮރުގެ މައްސަލަ ޙައްލުވެގެން “ ޑރ މުއިއްޒު ވިދާޅުވިއެވެ.
އިތުރަށް މުއިއްޒު ވިދާޅުވީ ކުޅުދުއްފުށީގައި 2000 (ދެ ހާސް) ހައުސިންގ ޔުނިޓްގެ މަޝްރޫއެއް ކުރިއަށް ގެންދާނެ ކަމަށާއި
ހައުސިންގް ޔުނިޓްތަކަށް ބޭނުންވާ އެހެނިހެން ވަސީލަތްތައް ލިބި ސިޓީއަށް އެކަމުން ފައިދާވެގެންދާނެ ކަމަށެވެ.
ޑރ މުއިއްޒު ވިދާޅުވީ އޭނާގެ ފަސްއަހަރު ނިމޭއިރު ގޯތީގައި ގެ ނޭޅިފައި އެއްވެސް ރައްޔިތަކު ނުހުންނާނެ ކަމަށެވެ.
“ ގޯތީގައި ގެދޮރު ބިނާކުރުމަށް ތަޢާރަފްކުރާ އެކިއެކި ލޯނުތަކުން މި ސިޓީގެ ރައްޔިތުންނަށް ފައިދާކުރާނެ “ މުއިއްޒު ވިދާޅުވިއެވެ.
ލޯންތައް ދޫކުރާނީ ޤާނޫނުތައް ހަދައިގެންނާއި ހުރި ޤާނޫނުތައް އިސްލާޙުކޮށްގެންނާއި ބޭންކް ނިޒާމަށް ގެންނަންޖެހޭ އިސްލާޙުތައް ގެނެސްގެން ކަމަށް ވެސް މުއިއްޒު ވިދާޅުވިއެވެ.
ކުޅުދުއްފުށީގެ ހުރިހައި މަގުތައް އަދި ރާއްޖޭގެ ހުރިހާ ސިޓީތަކެއް ހުރިހާ މަގުތަކެއް ވެސް ހަދައި ދެއްވާނެ ކަމަށް މުއިއްޒު ވިދާޅުވިއެވެ.