މިއަދު ހަވީރު ހދ.މަކުނުދޫގައި ގޭސް ސިލިންޑަރެއް ގޮވައިގެން ހިނގި ހާދިސާގައި ނިޔާވީ އެރަށު އެއަރޕޯޓު ބިން ހިންކާ ކުންފުނީގެ ދެ މުވައްޒަފުން ކަމަށް ފުލުހުން ބުނެފިއެވެ.
ފުލުހުންގެ މީޑިއާ އޮފިޝަލު ވިދާޅުވީ މިހާތަނަށް ބެލި ބެލުމުން އެނގުނު ގޮތުގައި ގޮވާފައިވަނީ މަކުނުދޫ މަސްމާރުކޭޓު ކައިރީގައި އޮތް ގޭސް ސިލިންޑަރެއް ކަމަށެވެ.
އެރަށުން ވާހަކަ ދެއްކި ބައެއް މީހުން ބުނި ގޮތުގައި މިހާދިސާ ހިނގާފައިވަނީ މިއަދު ހަވީރު 16:15 އެހާއިރުއެވެ. ކުއްލިއަކަށް ބާރުގަދަ ގޮވުމެއް ގޮވައި ބަނދަރުގެ އެކި ހިސާބުތަކުގައި އިންސާނުންގެ ހަށިގަނޑުގެ އެކި ބައިތައް ހުރި ކަމަށްވެސް ބައެއް މީހުން ބުނެފައިވެއެވެ.
ހދ. މަކުނުދޫ ބަނދަރު ސަރަހައްދުގައި ހުރި ސައިޓެއްގައި ގޭސް ސިލިންޑަރެއް ގޮވައި ބިދޭސީ ދެމީހަކު ނިޔާވި ޙާދިސާ ދިވެހި ފުލުހުންނާއި ގުޅިގެން ބަލަމުންދާ ކަމަށް އެމްއެންޑީއެފުން ބުނެފައިވެއެވެ.
