ގދ. ފިޔޯރިން ކުޑަކުއްޖަކު ގެއްލިގެން ހޯދަން ފަށައިފި އެވެ.
ފުލުހުން ވަނީ ފިޔޯރިން ކުޑަކުއްޖަކު ގެއްލިގެން މިރޭ 7:08 ގައި ފުލުހުންނަށް ރިޕޯޓުކޮށްފައިވާކަމަށް ވިދާޅުވެފައެވެ.
ގެއްލިގެން ހޯދަމުންދަނީ ގދ. ފިޔޯރީ، ފިނިވިލާގެ، އުމުރުން 9 އަހަރުގެ މަރިޔަމް މީނަލް މުހައްމަދު އެވެ.
ކުއްޖާގެ އާއިލާ އާއި ހަވާލާދީ ފުލުހުން ވިދާޅުވީ އެ ކުއްޖާ ގެއްލިފައިވަނީ ހަވީރު ފަހެއް ޖަހާކަށް ހާއިރު ގެއިންކަމަށެވެ.
ފުލުހުންނާއި ފިޔޯރީ ރައްޔިތުން ގުޅިގެން މީނަލް ހޯދުމުގެ މަސައްކަތް ދަނީ ކުރަމުންނެވެ.