ފެނަކަ އަދި ޙާއްސަކޮށް ނިމިދިޔަ ސަރުކާރުން ދިވެހި ޒުވާން ވިޔަފާރިވެރިންތަކެއް ބަނގުރޫޓުކޮށްލާފައިވާކަމަށް ވ. އަތޮޅު ފެލިދޫ ދާއިރާގެ މެމްބަރު އާދަމް ޒާހިރު ވިދާޅުވެއްޖެ އެވެ.
ފެނަނަ ހިންގުމުގައި އެކި ސަރުކާރުތަކުން އިސްކޮށްފައިވާ ފަރާތްތަކުގެ އިހުމާލުން ކުންފުންޏަށް ލިބިފައިވާ ގެއްލުންތަކާއި ގުޅިގެން އެ ކުންފުނިން އާންމުންނަށް ދޭ ހިދުމަތްތަކަށް ބުރުއަރާ ފުނުބެދޭ ވަރުގެ ގެއްލުން ލިބެމުންދާތީ، އެކަމަކީ ދިވެހިރައްޔިތުންނަށް އަސަރުކުރާ ބޮޑު މައްސަލައަކަށްވާތީ އެކަން ސަރުކާރުގެ ސަމާލުކަމަށް ގެނައުމަށް ފޭދޫ ދެކުނު ދާއިރާގެ މެމްބަރު އިބްރާހިމް ދީދީ (އައިބީ) މިއަދު ހުށަހެޅުއްވި ކުއްލި މައްސަލައަށް ބަހުސްކުރުން މިއަދު މަޖިލީހުގައި ވަނީ ކުރިއަށް ގެންގޮސްފައެވެ.
މިއަދުގެ ޖަލްސާގައި ފެނަކައިގެ ކުއްލި މައްސަލަ ހުށަހެޅުމާއެކު މަޖިލީހުގައި ތިބި އެމްޑީޕީގެ ޕީޖީ ގްރޫޕްގެ މެމްބަރުންވަނީ މަޖިލީހުގެ ތަޅުމުން ބޭރަށް ގޮސްފައެވެެ. މިކަމަށް ފާޑު ވިދާޅުވެ އާދަމް ޒާހިރު ވަނީ މައްސަލަ ހުށަހެޅުމާއެކު މެމްބަރުން މަޖިލީހުން ގެއްލުމަކީ ވެސް ބަލަންޖެހޭކަމެއް ކަމަށް ވިދާޅުވެފައެވެ.
ފެނަކައިގެ ކުއްލި މައްސަލަ އާޢި ގުޅޭގޮތުން ވާހަކަދައްކަވަމުން އާދަމް ޒާހިރު ވަނީ ފެނަކައިން އެކަނިވެސް 50 އަށްވުރެ ގިނަ މެދުފަންތީގެ ޒުވާން ވިޔަފާރިވެރިންތަކެއް ބަނގުރޫޓުކޮށްލާފައިވާކަމަށް ވިދާޅުވެފައެވެ. އަދި އެ ޒުވާނުން މިއަދު ތިބީ މަގުމަތިވެފައިކަމަށް އާދަމް ވަނީ ވިދާޅުވެފައެވެ.
“އެ ބޭފުޅުން މިއަދު އެތިބީީ ބަނގުރޫޓުވެފަ. ބައެއް ބޭފުޅުން އެތިބީ އަމިއްލަ ގެދޮރާއި އަމިއްލަ އުޅަނދުތައް ވިއްކާ، ކާނެބޯނެގޮތެއް ނެތިފަ. މިކަމަށް އަޅުގަނޑުމެން އެބަޖެހޭ ހައްލެއް ހޯދަދޭން.”
އާދަމް ވަނީ އެކަން ކުރި ފަރާތްތަކަށް ޤާނޫނީ ހަމަތަކުގެ މަތިން އެޅެންއޮތް އެންމެ ހަރުކަށި ފިޔަވަޅެއް އެޅުމަށް ގޮވާލައްވާފައެވެ.
މީގެއިތުރުން އާދަމްވަނީ މިދިޔަ ސަރުކާރުން ވެފައިވާ ދަރަނިތައް އަދާކޮށްފައިނުވާާއިރު، ނިމިދިޔަ ސަރުކާރުން ޗާޕްކުރި 8 ބިލިޔަން ރުފިޔާއަށް ވީ ކިހިނެތްތޯ ސުވާލު އުފައްދަވާފައެވެ.
“ދެން އަޅުގަނޑުމެންނަށް މި އުފެދޭ ސުވާލަކީ މި އަށް ބިލިޔަން ރުފިޔާ މިވަނީ ކޮންތާކަށްތޯ؟ ހަވަޔަށްތޯ ޖައްވަށްތޯ ފަޒަޔަށްތޯ އަރައިގެން މިދިޔައީ؟” އާދަމް ވިދާޅުވިއެވެ.
ހަމައެހެންމެ، ދަރަނި އޮތްތަނުގައި އޮއްވާ އެމްޑީއަށް ހާއްސަކޮށްގެން ލަގްޒަރީ އެސް ޔޫވީއެއް ދުއްވޭއިރު، ޗާޕްކުރި އަށް ބިލިޔަން ރުފިޔާއަށް ވީގޮތެއް ބަލަންޖެހޭކަމަށް އާދަމްވަނީ ވިދާޅުވިއެވެ.
އާދަމްވަނީ ވަގުތުން ވަގުތަށް އެކަން ކުރެއްވި ފަރާތްތަކުގެ ޕާސްޕޯޓު ހިފަހައްޓާ، ހައްޔަރުކޮށް އެޅެންހުރި ހުރިހާ ފިޔަވަޅުތަކެއް އަޅާ ގެއްލުން ލިބުނު ދިވެހި ޒުވާނުންނަށް އިންސާފު ޤާއިމްކޮށްދިނުމަށް ގޮވާލައްވާފައެވެ.