މާފުށީ ޖަލުގައި މުހައްމަދު ޖަމީލް ނިޔާވެފައި އޮއްވާ ފެނުނީ ސަޖިދައިގައި ވަނިކޮށް ކަމަށް ދާހިލީ ވަޒީރު އަލީ އިހުސާން ވިދާޅުވެއްޖެއެވެ.
ޖަމީލް ގޮޅިން ބޭރަށް ނުނިކުމެ، ހަރަކާތް ނުކޮތް ގިނައިރު އޮތްކަން ފާހަގަ ކުރެވިގެން މާފުށީ ޖަލުގެ މެޑިކަލް ސެންޓަރަށް ގެންގޮސް ވަނީ ސީޕީއާރް ދީފައެވެ. ނަމަވެސް އޭނާއަށް އެއްވެސް ބަދަލެއް ނައުމާ ގުޅިގެން، 12:13 ހާއިރު މާފުށީ ސިއްޙީ މަރުކަޒަށް ގެންގޮސް އޭނާއަށް ފަރުވާ ދޭން ފެށި ކަމަށް ކަރެކްޝަނުން ވަނީ ބުނެފައެވެ.
ކަރެކްޝަނުން ބުނި ގޮތުގައި އޭނާ ހިތް ހުއްޓިގެން ނިޔާވި ކަމަށް ކަނޑައަޅާފައިވަނީ 12:45ގައެވެ.
މިމައްސަލާގައި ޖަލުގައި އޭނާއަށް އަނިޔާކޮށްފައިވާ ކަމަށް ބައެއް ފަރާތްތަކުން ތުހުމަތު ކުރަމުން ދަނިކޮށް މިނިސްޓަރ އިހުސާން ވިދާޅުވީ، ޖަލުގައި މަރުވާ ކޮންމެ ގައިދީއެއްގެ މައްސަލައެއްވެސް ކަރެކްޝަނަލް ސަރވިސްގެ އިންސްޕެކްޓަރުން ތަޙުޤީޤް ކުރާ ކަމަށެވެ. އަދި ޤައިދީއެއްގެ މަރުގެ ޙާލަތާ ގުޅޭގޮތުން އެއްވެސް ޝައްކެއް އުފެދޭނަމަ، ހިއުމަން ރައިޓްސް ކޮމިޝަން އޮފް ދަ މޯލްޑިވްސްއިން ވެސް މިނިވަން ތަޙުޤީޤެއް ކުރިއަށް ގެންދާނެއެވެ. ވަޒީރު އިހުސާނު މިހާރުވެސް ވަނީ މި މައްސަލައާއި ގުޅިގެން ދިވެހި ފުލުހުންގެ ޚިދުމަތަށް މިކަމުގެ ފުރިހަމަ ތަޙުޤީޤެއް ކުރުމަށާއި، ޢާއިލާގެ ހުއްދައާއެކު ހަށިގަނޑުގެ ޕޯސްޓްމޯޓަމް ހެދުމަށް އެދިފައެވެ. ވަޒީރު ވަނީ މޯލްޑިވްސް ކަރެކްޝަނަލް ސަރވިސްއިން މި މައްސަލައިގެ ތަޙުޤީޤުގައި ހުރިހާ އިދާރާތަކަށް ފުރިހަމައަށް އެއްބާރުލުން ދޭނެ ކަމުގައިވެސް ވިދާޅުވެފައެވެ. އިހުސާން ވިދާޅުވީ، ޑޮކްޓަރު ޖަމީލުގެ މަރުގެ ސަބަބު ކަނޑައަޅާފައިވަނީ “ކާޑިއޯޕަލްމަނަރީ އެރެސްޓް” ގެ ގޮތުގައި ކަމަށެވެ. ޖަލުގެ ސީސީޓީވީ ފުޓޭޖުން ފެންނަ ގޮތުގައި، ޤައިދީ އޭނާގެ އެންމެ ފަހު ވަގުތު ނަމާދުކުރަމުންދިޔަ ކަމަށް ފެނުނު ކަމަށާއި އަދި ހެނދުނު އޭނާގެ ހަށިގަނޑު ފެނިފައިވަނީ އޭނާގެ ސެލްގައި “ސަޖިދަ” އަށް އޮއްވާ ކަމަށްވެސް ވަޒީރު ވިދާޅުވިއެވެ. މޯލްޑިވްސް ކަރެކްޝަނަލް ސަރވިސްއިން ސީސީޓީވީ ފުޓޭޖު ހުރިހާ ތަޙުޤީޤީ އިދާރާތަކާވެސް ޙިއްޞާކުރާނެ ކަމަށް ބުނެފައިވެއެވެ.