ރާއްޖޭގެ ރަށްތަކުގެ ތެރެއިން އާބާދީގައި ތިން ހާސް ހަމަ ނުވާނަމަ ކައުންސިލަށް ހޮވާނީ ތިން މެމްބަރުންކަމަށް ކަނޑައެޅުން ރަނގަޅުކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
ނާރެސް ޕޯޓަލްއައި، ކުރަނގި އޮޕަރޭޝަންގެ ފޭސް ދޭއް އިފްތިތާހު ކުރުމަށް މިރޭ ދަރުބާރުގޭގައި ބޭއްވި ރަސްމިއްޔާތުގައި ރައީސް ވަނީ ލާމަރުކަޒީ ނިޒާމަށް ގެންނަން ޖެހޭ ބަދަލުތަކާއި ގުޅޭގޮތުން ވާހަކަ ދައްކަވާފަ އެވެ. ދައުލަތް ހިންގުމުގެ ނިޒަމަށް ގެންނަން ނިންމެވި ބަދަލުތަކުގެ ތެރޭގައި، ކައުންސިލް މެމްބަރުންގެ އަދަދު މަދު ކުރުން ވެސް ހިމެނެ އެވެ. އަދި ގާނޫނަށް ގެންނަން ޖެހޭ އިސްލާހުތަކާއި، ނިޒާމު ބައްޓަން ކުރަން ޖެހޭ ގޮތުގެ ގައުމީ ދިރާސާ އޮގަސްޓު މަހުގެ ތެރޭގައި ލިބޭނެކަމަށް ލޯކަލް ގަވަމަންޓް މިނިސްޓްރީން ލަފާކުރެ އެވެ.
ރައީސް ޑރ. މުއިއްޒު ރޭ ވިދާޅުވީ ރާއްޖޭގެ ކައުންސިލްތައް ނުކަތާހާ ބޮޑުއިރު، އެ ކައުންސިލްތަކުގެ ސައިޒް ކުޑަ ކުރަން ޖެހޭ ކަމަށެވެ. ކައުންސިލްތަކުގެ ސައިޒް ކުޑަ ކުރުމަކީ ރައްޔިތުންގެ ބައިވެރިވުން ދޫކޮށްލަން ކުރާ ކަމެއް ނޫން ކަން ފާހަގަކުރައްވައި ރައީސް ވިދާޅުވީ ރަށްރަށުގައި ގިނަ އަދަދެއްގެ ކައުންސިލަރުންތަކެއް ތިބުމަކީ ވަރަށް ހަރަދު ހިނގާ ކަމެއް ކަމަށެވެ.
ރައީސް މުއިއްޒު ވިދާޅުވީ ކައުންސިލްތަކުގެ އަދަދު ސްޓްރީމްލައިން ކުރުން ވެގެން ދާނީ، ހިދުމަތްތައް ފުރިހަމަކޮށް ދެވޭނެ ސަބަބަކަށް ކަމަށެވެ. ގާނޫނު މިހާރު އޮތް ގޮތުން ކުޑަ އާބާދީއަކަށް ވެސް ގިނަ ކައުންސިލް މެމްބަރުން އިންތިހާބު ކުރަން ޖެހޭއިރު އެކަން ފާހަގަކުރައްވައި ރައީސް ވިދާޅުވީ މިކަމުގެ ސަބަބުން ބޮޑުވަނީ ކުރަން ޖެހޭ ހޭދަތައްކަމަށާއި ނެރެވޭ ނަތީޖާއެއް ނެތް ކަމަށެވެ.
އެފިޝިއަންޓު ރަނގަޅު ބަދަލުތަކަކަށް ބޭނުން ވަނީ ދިރާސާތައްކަމަށް ރައީސް ވިދާޅުވި އެވެ. އަދި އޭގެ އަލީގައި ބަދަލުތައް ގެންނާނީ މަޝްވަރާގެ ތެރެއިންކަމަށް ވިދާޅުވި އެވެ. އެއަށް ފަހު ރައީސް ވިދާޅުވީ އެމަނިކުފާނު ދެކިވަޑައިގަންނަވާ ގޮތުގައި، ތިންހާހަށް ވުރެ މީހުން މަދު ރަށްތަކުގައި ތިން ކައުންސިލް މެމްބަރުން ތިބޭ ގޮތަށް ހަމަޖެއްސުން ރަނގަޅެވެ.
“އަޅުގަނޑު ހިތުން ތިން ހާހަށްވުރެ ގިނަ ނޫން އާބާދީ އޮންނަ ރަށްތަކުގައި ތިން ބޭފުޅަކު، ތިން މީހަކު އިންތިހާބު ކުރުމުން ފުދޭނެ.. ކައުންސިލްގެ ރައީސަކާއި އަދި އިތުރު ދެ ބޭފުޅުން..” ރައީސް ވިދާޅުވިއެވެ.
ރައީސް ވިދާޅުވީ، މިކަންކަން ނިންމާނީ ފަންނީ ދިރާސާތަކުގައި އަލީގައި ކަމަށެވެ.
ރައީސް ވަނީ އަދަދު ކުޑަކޮށްގެން ދޭ ހިދުމަތް އެއަށްވުރެ ރަނގަޅަށްވެސް ދެވޭނެކަންވެސް ފާހަގަކުރައްވާފައެވެ. އަދި ހިދުމަތް ދިނުމުގައި އިހުލާސްތެރިވެ، ތެދުވެރިވެ، ހީވާގިވާން ޖެހޭ ކަަންވެސް ރައީސް ފާހަގަކުރެއްވިއެވެ.