މިދިޔަ ފަސް އަހަރުގެ ތެރޭގައި ފެނަކައިން ވުޖޫދުގައި ނެތް ކުންފުނިތަކަށްވެސް ބިލް ހަދައިގެން ފައިސާ ނެގިކަމަށް ދާންދޫ ދާއިރާގެ މެމްބަރު މުހައްމަދު ފަޒީލް ވިދާޅުވެއްޖެ އެވެ.
އައްޑޫ ސިޓީގެ ގުޅިފައިވާ ރަށްތަކުގައި ދިރިއުޅޭ ރައްޔިތުންގެ އަސާސީ ދިރިއުޅުމަށް ދަތިވާ ވަރަށް ކަރަންޓު ކެނޑެމުންދާތީ، އިދިކޮޅު އެމްޑީޕީން ރައްޔިތުންގެ މަޖިލީހަށް މިއަދު ކުއްލި މައްސަލައަށް ބަހުސްކުރައްވަމުން ފަޒީލްވަނީ ކަރަންޓުގެ ކަންކަން މިހާލަތަށް ގެންދިޔައީ ކޮންބައެއްތޯ ވިދާޅުވެ ސުވާލު އުފައްދަވާފަ އެވެ. 19 ވަނަ މަޖިލީހުގެ މެމްބަރުން ކުއްލި މައްސަލައެއްގެ ގޮތުގައި މަޖިލީހަށް މި މައްސަލަ ވައްދަން ލަދެއްވެސް ނުގަންނަކަމަށް ފަޒީލް ވިދާޅުވިއެވެ.
މީގެއިތުރުން ފަޒީލް ވަނީ އައްޑޫއަށް ދިމާވެފައިވާ މައްސަލައަކީ ރާއްޖޭގެ ހުރިހާ ރަށަކަށް ދިމާވެފައިވާ މައްސަލައެއްކަން ފާހަގަކުރައްވާފައެވެ. އެގޮތުން މި ސަރުކާރާއި ހަވާލުވިއިރު ދާންދޫގައި ހުރީ އެންމެ އިންޖީނެއް ކަމަށާއި، ބާކީ އިން ދެ އިންޖީނުގައި ނެތް އެއްވެސް މެއިންޓެނަންސް އެއް ކޮށްފައި ނުވާކަމަށް ފަޒީލް ވިދާޅުވިއެވެ.
” މި ސަރުކާރާއި ހަވާލުވިއިރު ދާންދޫގައި ހުރީ އެންމެ އިންޖީނެއް. ބާކީ އިން ދެ އިންޖީނުގައި ނެތް އެއްވެސް މެއިންޓެނަންސް އެއް ކޮށްފައެއް. ނިލަންދޫވެސް ހަމަ މިފަދަ ހާލެއްގަ. ކޮނޑޭގެ ކަރަންޓުގެ ވިއުގަ އޮތީ ހަލާކުވެ، ދަބަރަށްވެފަ. މާދަމާވެސް ކަރަންޓު ކެނޑިދާނެ. ” ފަޒީލް ވިދާޅުވިއެވެ.
އަދި ވޭތުވެދިޔަ ފަސް އަހަރުގެ ތެރޭގައި އިންޖީނުގޭތަކުގައި ޕްރިވެންޓިވް މެއިންޓިނަންސް ޕްރޮގްރާމެއް ހިންގާފައިނުވާކަމަށް ލަފާކޮށް، ޓެކްނިކަލް ކަންކަން ދެމެވަޑައިގަންނަވާ މީހެއްގެ ހައިސިއްޔަތުން 7 މަސް ދުވަސްތެރޭގައި އިންޖީނުތައް ހަލާކުވެގެނެއް ނުދާނެކަން ބުނަން އެނގޭކަމަށް ފަޒީލް ވިދާޅުވިއެވެ.
އަދި މިދިޔަ 5 އަހަރު ތެރޭގައި ޤައުމަށް ފައިދާހުރި ޤާނޫނެއްވެސް ނުހެދުނު ތަނުގައި، އެޖެންޑާ 19ގެ ނަމުގައި ގާނޫނުތައް ހެދީ މީހުން ފްރޭމްކުރަން ކަމަށް ފަޒީލް ވިދާޅުވިއެވެ.
އަދި ނިމިދިޔަ ފަސް އަހަރު ފެނަކައިން ކުރީ ހުސް ވައްކަން ކަމަށާއި، އެގޮތުން އެކިއެކި ނަންނަމުގައި ޕްރޮޖެކްޓްތައް ހިންގައިގެން ވެސް ވައްކަންކޮށްފައި ހުރިކަމަށް ފަޒީލް ވިދާޅުވިއެވެ.