ހިޔާ ޓަވަރުތަކުގެ އޭސީތަކުން ބޭރަށް ގުޅާފައި އިންނަ ހޮޅން ބޭރަށް ފެން ލީކުވުން ހައްލުކުރުމަށް ފްލެޓްތަކަށް ގޮސް މައުލޫމާތު ފޯރުކޮށްދިނުމަށް ހައުސިން ޑވެލޮޕްމަންޓް ކޯޕަރޭޝަން (އެޗްޑީސީ) އިން ނިންމައިފި އެވެ.
އެޗްޑީސީން ނެރުނު އިއުލާނެއްގައި ބުނީ ހިޔާ ފްލެޓްތަކުގެ އޭސީތަކުން ބޭރަށް ގުޅާފައި އިންނަ ހޮޅި ގުޅުމަށް ކަނޑައަޅާފައިވާ މައި ހޮޅުގެތެރެއަށް ބައެއް ފްލެޓްތަކަށް ނުގުޅާ ހުރުމުގެ ސަބަބުން އިމާރާތުގެ ވައިގޮޅިއަށް ފެން ފައިބާ، އިމާރާތަށާއި ބައެއް ފްލެޓްތަކަށް ގެއްލުން ލިބެމުންދާ ކަމަށެވެ.
އެހެންކަމުން އެ މައްސަލަ ހައްލުކުރުމަށްޓަކައި ފްލެޓްތަކުގައި ދިރިއުޅޭ ފަރާތްތަކަށް މި މައްސަލަ ހައްލުކުރާނެގޮތުގެ މައުލޫމާތު ހިއްސާކުރުމަށް ހަަމަޖެެހިފައިވާ ކަމަށް އެޗްޑީސީން ވަނީ ބުނެފައެވެ.
އަދި އެކަމަށްޓަކައި 11 އޮގަސްޓް ވާ އާދިއްތަ ދުވަހުން ފެށިގެން ހިޔާ ފްލެޓްތަކަށް އެޗްޑީސީގެ މުވައްޒަފުން ޒިޔާރަތްކުރާނެކަމަށް އެޗްޑީސީން ވަނީ ބުނެފައެވެ. އެޗްޑީސީން ވަނީ ޓަވަރުތަކަށް ޒިޔާރަތްކުރާނެ ގޮތުގެ މައުލޫމާތު ހިޔާ 7000 ވައިބަރ ކޮމިއުނިޓީގައި ހިއްސާކުރަމުންދާނެ ކަމަށް ބުނެފައެވެ.
އަދި އެ މަސައްކަތަށް ޓަވަރުތަކުގައި ދިރިއުޅޭ ރައްޔިތުން އެއްބާރުލުންދިނުމަށް އެ ކޯޕަރޭޝަނުން އެދިފައިވެއެވެ.