ވިނަރެސްގެ އެކްސަސް ކޮންޓްރޯލް ސިސްޓަމް މަރާމާތުކޮށް އަލުން ބޭނުންކުރަން ފެށުމަށް ތައްޔާރު ވެއްޖެއެވެ.
އެޗްޑީސީން ކުރި އިއުލާނެއްގައި ވަނީ 11 އޮގަސްޓްވާ އާދިއްތަ ދުވަހުން ފެށިގެން މި ސިސްޓަމް ބޭނުންކުރަން ފެށުމަށް ހަމަޖެހިފައިވާ ކަމަށާއި، ވިނަރެސްގެ އެކްސަސް ޓެގް ނުނަގާ ފަރާތްތަކުން ވީހާވެސް އަވަހަށް ޓެގް ނެގުމަށް އެދިފައެވެ.
ވިނަރެސްގެ އެކްސަސް ކޮންޓްރޯލް ސިސްޓަމް މަރާމާތުކޮށްފައި މިވަނީ ބަޔަކު އެ ސިސްޓަމަށް ގެއްލުންދީ ދޮރު ހަލާކުކޮށްލުމާއި ގުޅިގެންނެވެ. އެކަން ކުރި ފަރާތްތަކުގެ ވީޑިއޯވެސް އެޗްޑީސީން އޭރުވަނީ އާންމުކޮށްފައެވެ.
އެޗްޑީސީން ވަނީ ވިނަރެސްގެ އެކްސަސް ކޮންޓްރޯލް ސިސްޓަމް ފަދަ ތަކެއްޗަކީ އިމާރާތުގައި ދިރިއުޅޭ ރައްޔިތުންގެ ސަލާމަތާއި ރައްކާތެރިކަމަށް ހަރުކޮށްފައި ހުންނަ ތަކެއްޗަށް ވީހިނދު، އެ ތަކެއްޗަށް ގެއްލުން ދިނުމަކީ ހިދުމަތް ހޯދާ ފަރާތްތަކުގެ ހައްގަށް އުނިކަން އަންނާނޭކަމެއްގެ ކަމުގައި ބުނެފައެވެ.
އަދި އެފަދަ ތަކެއްޗަށް ގެއްލުންދޭ ފަރާތްތަކާއި މެދު ފިޔަވަޅު އަޅާނެކަމަށްވެސް އެޗްޑީސީން ބުނެފައިވެއެވެ.