ފަލަސްތީނުގައި ހިންގާ ނަސްލު ނައްތާލުމުގެ އަމަލުތައް ނިމުމަކަށް ގެނެވޭނީ ޤާނޫނުގެ ވެރިކަމަށް އިޙްތިރާމްކޮށް ޤާނޫނީ ވެރިކަމެއް ޤާއިމުކޮށްގެންކަމަށްވާތީ އެކަން ކަށަވަރުކުރުމަށް ބައިނަލްއަޤްވާމީ މުޖުތަމަޢަށް ރާއްޖެއިން ބާރުއަޅައިފިއެވެ.
ޒަމީރު މިފަދައިން ވިދާޅުވީ، ޚާރިޖީ ވަޒީރުންގެ ފެންވަރުގައި އިއްޔެ ސައުދީ އަރަބިއްޔާގެ ޖިއްދާގައި ބޭއްވި އޯގަނައިޒޭޝަން އޮފް އިސްލާމިކް ކޯޕަރޭޝަން (އޯއައިސީ) ގެ އެގްޒެކްޓިވް ކޮމިޓީގެ އޯޕަން އެންޑެޑް އެކްސްޓްރާ އޯޑިނަރީ ބައްދަލުވުމުގައި ދެއްވި ތަގުރީރުގައެވެ.
ޒަމީރުގެ ތަގްރީރުގައި ވަނީ އިސްރާއިލުން މެދުކެނޑުމެއްނެތި ފަލަސްތީނުގައި ހިންގަމުންދާ ނަސްލު ނައްތާލުމުގެ އަމަލުތައް ހަރުކަށި އިބާރާތުން ކުށްވެރި ކުރައްވާފައެވެ. އަދި ވަކި ގައުމެއް ނުވަތަ ގައުމުތަކެއް އިސްތިސްނާ ނުވާނެހެން ބައިނަލްއަގްވާމީ ގާނޫނާއި ބައިނަލްއަގްވާމީ އިންސާނީ ހައްގުތަކާބެހޭ ގާނޫނު ތަންފީޒުކުރުމަކީ ބައިނަލްއަގްވާމީ މުޖުތަމައުގެ ޒިންމާއެއްކަމުގައި އޭނާ ވިދާޅުވިއެވެ. ހަމައެއާއެކު، ހަނގުރާމަ ވަގުތުން ހުއްޓާލައި ފަލަސްތީނު ރައްޔިތުންގެ ޒަރޫރީ ބޭނުންތަކަށް ބޭނުންވާ އަސާސްތައް އެ ރައްޔިތުންނަށް ފޯރާކަން ކަށަވަރުކުރުމަކީ މި ވަގުތައް އެންމެ މުހިންމުކަން ކަމުގައި މިނިސްޓަރުގެ ތަގްރީރުގައި ގޮވާލެއްވިއެވެ.
މި ބައްދަލުވުމުގައި މިނިސްޓަރު ވަނި، ރާއްޖެއިން އަބަދުވެސް ފަލަސްތީނު ރައްޔިތުންގެ ހައްގުގައި ވަކާލާތުކޮށް، ފަލަސްތީނުގެ މައްސަލައަށް ދާއިމީ ހައްލެއް ހޯދައި ދިނުމަށް އެގައުމާއެކު ތިބޭނެކަމުގެ ޔަޤީންކަން ދެއްވާފައެވެ.
މިނިސްޓަރ ޒަމީރު ވަނީ ފަލަސްޠީނު މައްސަލައަށް ދެމެހެއްޓެނިވި ޙައްލެއް ހޯދޭނީ 1967ގެ ކުރީގެ ބޯޑަރުތަކުގެ މައްޗަށް އެކުލެވިފައިވާ، އިރުމަތީ ޤުދުސް ވެރިރަށެއްގެ ގޮތުގައި ކަނޑައެޅިފައިވާ ގޮތަށް ފަލަސްޠީން އިސްރާއީލުގެ އަތްދަށުން މިނިވަންކޮށް، އެއީ މިނިވަން، މުސްތަޤިއްލު އަދި އަމިއްލަ ސިޔާދަތީ ބާރު ހިނގާ ޤައުމަކަށް ހެދުމުގެ މުހިންމުކަން ފާހަގަކުރައްވާފައެވެ.
މީގެ އިތުރުން، އެ މަނިކުފާނު ވަނީ ހަމާސްގެ ޗީފް އޮފް ޕޮލިޓިކަލް ބިއުރޯ، އިސްމާއިލް ހަނިއްޔާ އަވަހާރަކޮށްލައިފައިވާތީ، އެކަން ކުށްވެރިކުރައްވާފައެވެ.
އޯއައިސީއަކީ ފަލަސްތީނުގެ ރައްޔިތުންގެ ހައްގުގައިއި މެދުކެނޑުމެއްނެތި ވަކާލުތުކުރަމުންދާ 57 މެމްބަރު ގައުމުތަކުގެ މައްޗަށް އެކުލެވޭ ޖަމިއްޔާއެކެވެ. ރާއްޖެ އޯއައިސީގެ މެމްބަރު ގައުމަކަށްވީ 1976 ވަނަ އަހަރުއެވެ.