ރާއްޖޭގައި އަލަށް އުފައްދާ ޑިވެލޮޕްމަންޓް ބޭންކަކީ އިންވެސްޓަރުންނަށް ހަބަކަށް ވާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު ވިދާޅުވެއްޖެއެވެ.
ރައީސް އޮފީހުގެ ރަސްމީ “އެކްސް” އެކައުންޓުންކުރި މިއަދު ކުރި ވީޑިއޯ ޕޯސްޓެއްގައި ރައީސް ވިދާޅުވީ ރާއްޖޭގައި ފުރަތަމަ ފަހަރަށް ތައާރަފުކުރެވޭ ޑިވެލޮޕްމަންޓް ބޭންކްގެ ޗެއާމަން އަދި ސީއީއޯ އާ ކުޑައިރުކޮޅެއްގެ ތެރޭގައި ބައްދަލުކުރެއްވުމަށް ހަމަޖެހިފައިވާ ކަމަށެވެ.
ރައީސް ވިދާޅުވިގޮތުގައި ޑިވެލޮޕްމަންޓް ބޭންކު އުފެއްދުމަކީ ރާއްޖޭގެ އިޤްތިޞާދު ފުޅާކުރުމަށް އެމަނިކުފާނުގެ މެނިފެސްޓޯގައި ކަނޑައަޅުއްވާފައިވާ އެންމެ މުހިންމު އެއް ވަޢުދެވެ.
“އަޅުގަނޑުމެންގެ ރާއްޖޭގެ އިގުތިސޯދު ފުޅާކުރުމަށް ޓަކައި، އިގުތިސޯދު ޑައިވާސިފައިކޮށް އިގުތިސޯދު ކުރިއަށް ގެންދިއުމަށްޓަކައި ސަރުކާރުން ކަނޑައަޅައިވާ އަޅުގަނޑުމެންގެ މެނިފެސްޓޯގައި އޮތް އެންމެ މުހިންމު އެއް ވައުދު،” ފެށިގެން ދަނީ ވަރަށް ތާރީހީ ކަމެއް ކަން ފާހަގަކުރައްވާ ރައީސް ވިދާޅުވި އެވެ.
ހަމައެއާއެކު ޑިވެލޮޕްމަންޓް ބޭންކް ވެގެން ދާނީ ރާއްޖޭގައި އިންވެސްޓް ކުރަށްވާ ފަރާތްތަކަށް ހަބަކަށް ކަމަށްވެސް ރައީސް މިއަދު ވިދާޅުވިއެވެ.
މީގެއިތުރުން ރައީސް ވަނީ ބޭންކްގެ ސީއީއޯ ކަމާ އަދި ޗެއާމަން ކަމަށް އައްޔަން ކުރެވުނީ ދުނިޔޭގެ އެކި ތަންތަނުގައި ވަރަށް ތަޖުރިބާކާރު، ވަރަށް ގިނަ ދުވަހު މަސައްކަތް ކޮށްފައިވާ ބޭފުޅުން ކަމަށާއި، އިތުރުން އެ ބޭންކް ވެގެންދާނީ ރިއަލް އެސްޓޭޓާއި ހައުސިން މާކެޓާ އަދި އެހެން ދާއިރާތަކަށް ވެސް ފައިދާކުރަނިވި ބޭންކަކަށް ކަމަށް ވިދާޅުވެފައެވެ.
ރައީސް މިކަން ވަނީ ވަރަށް ތާރީޙީ ކަމެއްގެ ގޮތުގައި ފާހަގަކުރައްވާފައެވެ.
“ޑިވެލޮޕްމަންޓް ބޭންކް އޮފް މޯލްޑިވްސް ލިމިޓެޑް” ގެ ނަމުގައި ދިވެހި ސަރުކާރުގެ ސައްތައިންސައްތަ ހިއްސާ އެކުލެވިގެންވާ، ސަރުކާރުގެ ކުންފުންޏެއް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އުފެއްދެވީ މިއަހަރުގެ މެއި މަހުގެ 16 ވަނަ ދުވަހުއެވެ.
ޑިވެލޮޕްމަންޓް ބޭންކް އޮފް މޯލްޑިވްސް އަކީ ސަރުކާރުގެ ސިޔާސަތުތަކާ އެއްގޮތްވާ ގޮތުގެ މަތީން، ދެމެހެއްޓެނިވި އިޤްތިޞާދީ އަދި އިޖުތިމާޢީ ތަރައްޤީއަށް އިންވެސްޓުކުރުމާއި، ޢުމްރާނީ ތަރައްޤީއަށް ބޭނުންވާ ފައިސާ ހޯދުމާއި، ސިންޑިކޭޝަން ފައިނޭންސް މެދުވެރިކޮށް ޕީ.އެސް.އައި.ޕީ މަޝްރޫޢުތަކަށް ފައިސާ ފޯރުކޮށްދިނުމުގައި ދިމާވާ ގޮންޖެހުންތައް ޙައްލުކުރުމާއި، ދިވެހިރާއްޖޭގެ ބޭންކިންގ ނިޒާމުގައި ބޭރު ފައިސާ ބެހެއްޓުމުގެ ޝައުޤުވެރިކަން އިތުރުކުރުމުގެ ބޭނުމުގައި އުފެއްދި ކުންފުންޏެކެވެ.