ރޭ ދަންވަރު ބޮޑުތަކުރުފާނު މަގުގައި ކާރަކާއި ސައިކަލެއް ޖެހި ހިނގާދިޔަ އެކްސިޑެންޓުގައި އަނިޔާ ލިބުނު ޒުވާނާގެ ހާލު ސީރިއަސްވެ އައިސީޔޫގައި ފަރުވާދެމުންދާ ކަމަށް އައިޖީއެމްއެޗުން މިއަދު ބުނެފިއެވެ.
މާލޭގައި ރޭ މި އެކްސިޑެންޓް ހިނގާފައިވަނީ ބޮޑުތަކުރުފާނު މަގާއި ކޮއިމަލާ ހިނގުން ގުޅޭ ކަންމަތީގައި ސައިކަލަކާއި ކާރެއް ޖެހިގެންނެވެ. މި އެކްސިޑެންޓް ހިނގަން މެދުވެރިވި ސަބަބެއް މިހާތަނަށް އެނގިފައި ނުވާއިރު، ފުލުހުންގެ މީޑިއާ އޮފިޝަލް ވިދާޅުވީ، ބޮޑުތަކުރުފާނު މަގުގައި ސައިކަލަކާއި ކާރެއް ޖެހިގެން އެކްސިޑެންޓެއް ހިނގާފައިވާ ކަމުގެ ރިޕޯޓް ރޭ 12:53 ގައި ރިޕޯޓް ކޮށްފައިވާ ކަމަށެވެ.
މި އެކްސިޑެންޓްގައި އަނިޔާވެގެން ސައިކަލު ދުއްވަންއިން އުމުރުން 21 އަހަރުގެ ދިވެހި ފިރިހެނަކު އައިޖީއެމްއެޗަށް ފަރުވާ ދިނުމަށް ގެންދިޔަ ކަމަށް ވެސް ވިދާޅުވިއެވެ. އަދި އެކްސިޑެންޓްގައި ކާރަށާއި ސައިކަލަށް އެކިވަރުގެ ގެއްލުން ވެފައިވާ ކަމަށް ވެސް އޮފިޝަލް ވިދާޅުވިއެވެ.
އަނިޔާވި ޒުވާނާއާ ގުޅޭގޮތުން އައިޖީއެމްޗާއި ހަވާލާދީ ބައެއް ނޫސްތަކުގައި ވަނީ ރޭ އެކްސިޑެންޓްވެގެން ގެނައި ޕޭޝަންޓް، އައިސީޔޫގެ ވެންޓިލޭޓަރުގައި ފަރުވާދެމުންދާ ކަމަށް ބުނެފައެވެ.
އޭނާއަށް ވެންޓިލޭޓަރުގައި ފަރުވާ ދެމުން އައި ނަމަވެސް، އޭނާއަށް ލިބުނު ޒަހަމްތަކުގެ ތަފްސީލެއް މިހާތަނަށް އެނގިފައެއް ނުވެއެވެ.
ފުލުހުން ދަނީ މި އެކްސިޑެންޓާއި ގުޅިގެން އިތުރަށް ބަލަންޖެހޭ ކަންކަން ބަލަމުންނެވެ.