މިއަދު ރާއްޖޭގެ މިސްކިތްތަކުގައި ދެވުނު ޙުތުބާގައި، ކީރިތި ޤުރްއާނާއި ރަސޫލާގެ ޙަދީޘްތަކާ ޚިލާފުވާ ގޮތަށް އެކި ފަރާތްތައް މާތްކުރުމަކީ ޝިރުކުކުރުމަށް މަގުފަހިވެދާނެ ކަމެއްކަމަށް ބަޔާންކޮށް، އެފަދަ ޢަމަލުތަކުން ދުރުހެލިވުމަށް ގޮވާލައިފިއެވެ.
“ޝިރުކުކުރުމުން ދުރުހެލިވާށެވެ!” މި ސުރުޚީގެ ދަށުން ދެވުނު މި ޙުތުބާގައި، އިންސާނާ ކުރާ އެންމެ ބޮޑު ފާފައަކީ އޭނާ ހެއްދެވި ﷲ އަށް ޝަރީކުކުރުން ނުވަތަ އެކަލާނގެއާ އެކަލާނގެ މަޚުލޫޤުންނާ ހަމަހަމަކުރުން ކަމަށް ބަޔާންކޮށްފައިވެއެވެ.
ޙުތުބާގައި ފާހަގަކޮށްފައިވާ ގޮތުގައި، ﷲ އަށް ޝަރީކުކުރާ މީހުން މި ދުނިޔޭގައި މަދެއް ނޫނެވެ. ބައެއް މީހުން ޝަރީކުކުރަނީ ﷲ އާ ދެމެދު ގުޅުން ބެހެއްޓުމަށް ވަސީލަތެއްގެ ގޮތުގައި ކަމަށާއި، އަނެއްބައި މީހުން ޝަރީކުކުރަނީ ބައެއް މަޚުލޫޤުންނަކީ ﷲ އަށް ލިބިވޮޑިގެންވާ ފަދަ ބާރުތަކަކާއި ކުޅަދާނަކަމެއް ލިބިގެންވާ ފަރާތްތަކެއް ކަމަށް ޤަބޫލުކޮށްގެން ކަމަށް ވެސް ޙުތުބާގައި ބަޔާންކޮށްފައިވެއެވެ.
ޢަމަލު ޤަބޫލުކުރެވޭނީ ދެ ޝަރުތެއް ފުރިހަމަވުމުން ކަމަށް ޙުތުބާގައި ބުނެފައިވެއެވެ. އެއީ ނިޔަތް ﷲ އަށް ޚާލިޞްކުރުމާއި، އެ ޢަމަލަކީ ޝަރުޢީ ދަލީލަކުން ސާބިތުވާ ކަމަކަށްވުމެވެ.
ީހަކު ކުރާ ޢަމަލެއްގައި ޝަރީކުކުރުމާއި، ކަންދެއްކުމާއި، އަދި އެނޫން ވެސް އެފަދަ އެހެން ކަންތައް ވާ ނަމަ އެ ޢަމަލެއް الله سبحانه وتعالى ޤަބޫލުނުކުރައްވާނޭކަން ބަޔާންކުރައްވައި އެކަލާނގެ ކުރައްވާފައިވާ ވަޙީގެ މާނާގައި ވެއެވެ. “ކަލޭގެފާނު ވިދާޅުވާށެވެ! ތިމަންކަލޭގެފާނު ވާކަން ކަށަވަރީ ތިޔަބައިމީހުން ކަހަލަ އާދަމުގެ ދަރިޔަކު ކަމުގައެވެ. ތިމަންކަލޭގެފާނަށް ވަޙީ އިއްވަވަނީ ތިޔަބައިމީހުންގެ އިލާހަކީ އެއް އިލާހެއް ކަމުގައެވެ. ފަހެ އެމީހެއްގެ ވެރި ރަސްކަލާނގެއާއި ބައްދަލުވުމަށް އެދޭ މީހާ ދަންނާށެވެ. ފަހެ އެ މީހާ ޞާލިޙު ޢަމަލުން ޢަމަލުކުރާހުށިކަމެވެ. އަދި އެ މީހާގެ ވެރި ރަސްކަލާނގެއަށް އަޅުކަންކުރުމުގައި އެކަކުވެސް ބައިވެރި ނުކުރާހުށިކަމެވެ.” [1] سورة الكهف: ١١٠
ޝިރުކުކުރުމަކީ ހަމައެކަނި ބުދަށް އަޅުކަންކުރުން ނޫންކަމަށާއި، ގައިގާ އަޅާ ގަހާނެގެ ސަބަބުން ވެސް ޝިރުކުކުރެވިދާނެކަމަށް ޙުތުބާގައި ބަޔާންކޮށްފައިވެއެވެ.
ޙުތުބާ ނިންމާލަމުން، ކީރިތި ޤުރްއާނާއި ރަސޫލާގެ ޙަދީޘްތަކާ ޚިލާފުވާ ގޮތަށް އެކި ފަރާތްތައް މާތްކުރުމަކީ ޝިރުކުކުރުމަށް މަގުފަހިވެދާނެ ކަމެއްކަމަށް ބުނެ، ހެޔޮ ޢަމަލު ކުރުމުގެ ނަމުގައި އެފަދަ ވިޔާނުދާ ޢަމަލުތަކަށް އަރައިނުގަތުމަށް ނަސޭހަތްތެރިވެފައިވެއެވެ.