ބާރަށް ދުއްވުމުން ހަރުކަށި ފިޔަވަޅުތައް އެޅުމަށް ގާނޫނުތަކަށް ބަދަލު ގެނައުމަށް ރައީސް ޑރ. މުޙައްމަދު މުއިއްޒު މިއަދު ސަރުކާރުގެ ކަމާގުޅުންހުރި އިދާރާތަކަށް އަންގަވައިފިއެވެ.
‘އެކްސް’ގައި ލިޔުއްވި ޕޯސްޓެއްގައި ރައީސް ވަނީ، ބާރު ސްޕީޑްގައި އުޅަނދުފަހަރު ދުއްވުމުގެ ސަބަބުން ހިނގާ އެކްސިޑެންޓުތައް ހުއްޓުވުމަކީ ހުރިހާ އެންމެންގެ ޒިންމާއެއްކަން ހަނދާންކޮށްދެއްވައި، މަގުތަކަކީ އެންމެންނަށް އަމާން ތަންތަނުގެ ގޮތުގައި ހައްދަވައިދެއްވާނެ ކަމުގެ ޔަގީންކަން ދެއްވައިފައެވެ.
“ނުރައްކާތެރިކޮށް ބާރު ސްޕީޑުގައި ދުއްވާ ދުއްވުންތައް ހުއްޓުވައި، މާލެއާއި ރާއްޖޭގެ އެހެނިހެން ރަށްރަށުގެ މަގުތަކަކީ އެންމެންނަށްވެސް އަމާންކަމާއެކު ބޭނުންކުރެވޭނެ ތަންތަންކަމުގައި ހެދުމަށްޓަކާ ސަރުކާރުން ކުރަންޖެހޭ އެންމެހާ ކަންކަން މިސަރުކާރުން ކުރާނެކަމުގެ ޔަގީންކަން ހުރިހާ ރައްޔިތުންނަށް އަރުވަން،” ރައީސް ވިދާޅުވިއެވެ.
ރައީސް ވަނީ ރާއްޖޭގެ އެއްވެސް ރަށެއްގައި، އެއްވެސް ވަގުތަކު ބާރު ސްޕީޑުގައި ވެހިކަލް ދުއްވާ ފަރާތްތަކާމެދު ހަރުކަށި ފިޔަވަޅުތައް އެޅުމަށް ގާނޫނުތަކާއި ގަވާއިދުތަކަށް ގެންނަންޖެހޭ ބަދަލުތައް ގެނެސް، އެކަންކަން ތަންފީޒުކުރަން ފަށަން ސަރުކާރުގެ ކަމާގުޅުންހުރި އިދާރާތަކަށް މިހާރު އަންގަވައިފައިވާ ކަމަށް ވިދާޅުވެފައެވެ.
ރައީސް މިފަދައިން ވިދާޅުވެފައި ވަނީ ބާރު ސްޕީޑްގައި ދުއްވި ކާރެއްގައި ޖެހި، އުމުރުން 23 އަހަރުގެ ހަސަން ސަމާހު ނިޔާވި ހާދިސާ އާ ގުޅިގެންނެވެ. ރޭ މެންދަމުގެ ވަގުތެއްގައި ސަމާހު ނިޔާވީ، މިއަދު ހެނދުނު ހުޅުމާލޭގައި ޓޯޓަލް ފިޓްނެސް ގްރޫޕް (ޓީއެފްޖީ) އިން ބޭއްވި ‘ބޮޑު 5’ ދުވުމުގައި ބައިވެރިވުމަށް ސައިކަލުގައި ދިޔަ ވަގުތުގައެވެ.
އެ މައްސަލައާ ގުޅިގެން ފުލުހުން ވަނީ ރޭސްކާރު ދުއްވަން އިން މީހާ ހައްޔަރުކޮށްފައެވެ. އެއީ އައްޑޫ ސިޓީ ހިތަދޫ، ވައިލެޓްފިހި، އުމުރުން 26 އަހަރުގެ މުޙައްމަދު ވިސާމް ސިދުގީ ކަމަށް ފުލުހުން ބުނެފައިވެއެވެ.