ކޮންގްރެސް އިން ތައްޔާރުވަމުން މިދަނީ ދިވެހިރާއްޖޭގައި މިހާތަނަށް ބޭއްވޭނެ ޕާޓީއެއްގެ އެތެރޭގެ އެންމެ ބޮޑު އިންތިޚާބަށް ކަމަށް އިނގުރައިދޫ ދާއިރާގެ މެންބަރު އިބްރާހިމް ފަލާހު ވިދާޅުވެއްޖެއެވެ.
ފަލާހު މިހެން ވިދާޅުވީ މިއަދު ކޮންގްރެސް ޕާޓީގެ އެތެރޭގެ އިންތިހާބާ ގުޅޭ މައުލޫމާތު ދިނުމަށް ޕީއެންސީ ލީޑާޝިޕުން ބޭއްވި ނޫސްވެރިންގެ ބައްދަލުވުމުގައެވެ.
ފަލާހު ވިދާޅުވި ގޮތުގައި މި އިންތިޚާބުގައި ރާއްޖޭގެ އެކި ކަންކޮޅުތަކުން ޖުމްލަ 2،095 މެންބަރުން ޕާޓީގެ އެކިއެކި މަޤާމުތަކަށް އައްޔަން ކުރެވޭނެއެވެ.
މީގެއިތުރުން ފަލާހު ވަނީ ނޮވެމްބަރުގެ ނިޔަލަށް 75،000 މެންބަރުން ހިމެނޭ ޕާޓީ ހެދުމަށް މަސައްކަތް ކުރަމުންދާ ކަަމަށާއި، މިހާރުވެސް ޕީއެންސީއަށް ވަނުމަށް ހުށަހަޅާފައިވާ ފޯމުތަކުގެ އަދަދު 50،000 ހަމަވާ ވަރަށް ލިބިފައި އެބަހުރި ކަމަށް ވިދާޅުވެފައެވެ.
އަދި މިއަހަރުގެ ނޮވެމްބަރު މަހުގެ ނިޔަލަށް ޕީއެންސީ ވެގެންދާނީ ރާއްޖޭގައި އޮތް އެންމެ ބޮޑު ޕާޓީއަށް ކަމަށްވެސް އޭނާ ވިދާޅުވިއެވެ.
ފަލާހު ވަނީ މިހާރުގެ ސަރުކާރަކީ ޕީއެންސީގެ ވެރިކަމެއް ކަމަށާއި، ޕާޓީގެ ރައީސް ޑރ. މުޙައްމަދު މުޢިއްޒު އަކީ މިވަގުތު ރާއްޖޭގެ ރައީސުލްޖުމްހޫރިއްޔާ ކަމުން، ސަރުކާރު ދެމެހެއްޓުމަށްޓަކައި ސަރުކާރަށް ބޭނުންވާ ހުރިހާ އެހީތެރިކަމެއް ދިނުމަށް ޕީއެންސީ އަބަދުވެސް ތައްޔާރަށް ތިބޭނެ ކަމަށްވެސް ވިދާޅުވެފައެވެ.
“ރައީސް މުޢިއްޒުއަކީ މިހާތަނަށް ރާއްޖޭގެ ތާރީޚް ނުދެކޭ ފަދަ ޚިދުމަތްތަކެއް މި ޤައުމަށް ކޮށްދޭނެ ވެރިޔެއް ކަމާ ދޭތެރޭ ރާއްޖޭގެ ރައްޔިތުން ޝައްކެއް ނުކުރައްވާނެ،” ފަލާހު ވިދާޅުވިއެވެ.
އަދި މިއަހަރުގެ ނޮވެމްބަރު މަހުގެ ނިޔަލަށް ޕީއެންސީ ވެގެންދާނީ ރާއްޖޭގައި އޮތް އެންމެ ބޮޑު ޕާޓީއަށް ކަމަށްވެސް ފަލާހު ވިދާޅުވިއެވެ.