ޕީއެންސީ ކޮންގްރެސްގެ އެތެރޭގެ އިންތިހާބު އޮކްޓޫބަރު 19 ވަނަ ދުވަހު ބޭއްވުމަށް ނިންމައި، އިންތިހާބުގައި ވާދަކުރުމަށް ބޭނުންވާ ފަރާތްތަކަށް އެ ފުރުސަތު ހުޅުވާލައިފިއެވެ.
މި ފުރުސަތު ހުޅުވާލީ ކޮންގްރެސް ޕާޓީގެ އެތެރޭގެ އިންތިހާބާ ގުޅޭ މައުލޫމާތު ދިނުމަށް ޕީއެންސީ ލީޑާޝިޕުން މިއަދު ބޭއްވި ނޫސްވެރިންގެ ބައްދަލުވުމުގައެވެ. ކޮންގްރެސްއިން މިހާރު ތައްޔާރުވަމުން ދަނީ ރާއްޖޭގައި މިހާތަނަށް ބޭއްވޭނެ ޕާޓީގެ އެތެރޭގެ އެންމެ ބޮޑު އިންތިހާބު ބޭއްވުމަށެވެ.
ނޫސްވެރިންގެ ބައްދަލުވުމުގައި ވާހަކަ ދައްކަވަމުން ރައްޔިތުންގެ މަޖިލީހުގެ އިނގުރައިދޫ ދާއިރާގެ މެންބަރު އިބްރާހީމް ފަލާހު ވިދާޅުވީ މި އިންތިހާބުގައި ރާއްޖޭގެ އެކިކަންކޮޅުތަކުން ޖުމްލަ 2،095 މެންބަރުން އެކިއެކި މަގާމުތަކަށް އައްޔަން ކުރެވޭނެ ކަމަށެވެ.
މިގޮތުން މި އިންތިހާބުގައި
ދާއިރާގެ ރައީސުން
ދާއިރާގެ ނައިބު ރައީސުން
ޒުވާނުންގެ ހަރަކާތުގެ ރައީސުން
އަންހެނުންގެ ހަރަކާތުގެ ރައީސުން
ސްޓިއަރިންގް ކޮމިޓީތަކުގެ މެންބަރުން އިންތިހާބު ކުރެވިގެންދާނެއެވެ.
ޕާޓީގެ އެތެރޭގެ އިންތިހާބަށް މިއަދު ހުޅުވާލާފައި ވާއިރު، އިންތިހާބަށް ކުރިމަތިލުމުގެ ސުންގަޑިއަކީ މި މަހުގެ 30 ވަނަ ދުވަހުގެ ހަވީރު 6:00 ކަމަށް ޕީއެންސީއިން ބުނެއެވެ. އަދި އިންތިހާބުގައި ވޯޓުލުމާއި ވާދަކުރުމުގެ ހައްގު ލިބިފައި ވަނީ ހަމައެކަނި ޕީއެންސީގެ މެންބަރުންނަށް ކަމަށާއި މި މަހުގެ 30 ވަނަ ދުވަހުގެ ނިޔަލަށް ޕާޓީގެ މެންބަރަކަށްވާ ކޮންމެ މީހަކަށް ވެސް އިންތިހާބުގައި ވޯޓުލުމާއި އިންތިހާބުގައި ވާދަކުރުމުގެ ހައްގު ލިބިގެންދާނެ ކަމަށް ޕީއެންސީއިން ބުނެއެެވެ.