ބޮޑެތި މީހުންނަށް މަންކީޕޮކްސްއާ ދެކޮޅަށް ވެކްސިނެއް ބޭނުންކުރުމަށް ދުނިޔޭގެ ސިއްހީ ޖަމްއިއްޔާ (ޑަބްލިއުއެޗްއޯ) އިން ފުރަތަމަ ފަހަރަށް ހުއްދަ ދީފިއެވެ.
ބަވޭރިއަން ނޯޑިކް އޭ/އެސް އިން ތައްޔާރުކުރި މި ވެކް ވެކްސިން ދިނުމަށް ހުއްދަ ދިނުމުން، ގަވީ އަދި ޔުނިސެފް ފަދަ ބައިނަލްއަޤްވާމީ ޖަމްއިއްޔާތަކަށް މި ވެކްސިން ގަނެ، ބޭނުންވާ ޤައުމުތަކަށް ފޯރުކޮށްދިނުމުގެ ފުރުސަތު ލިބިގެންދާނެއެވެ. ނަމަވެސް، މި ވެކްސިން އުފައްދަނީ އެންމެ ފަރާތަކުން ކަމުން، އޭގެ ސަޕްލައި މަދުވާނެއެވެ.
“އެމްޕޮކްސްއާ ދެކޮޅަށް ފުރަތަމަ ފަހަރަށް ވެކްސިނެއް ޤަބޫލުކުރުމަކީ މި ބަލި ކޮންޓްރޯލް ކުރުމަށް ކުރެވޭ މުހިންމު މަސައްކަތެއް. މިއީ އެފްރިކާގައި މިހާރު ފެތުރެމުންދާ ބަލީގެ ރޮނގުތަކާއި، އަދި މުސްތަޤްބަލުގައި މި ބަލި ކޮންޓްރޯލް ކުރުމަށް ވަރަށް މުހިންމު ފިޔަވަޅެއް” ޑަބްލިއުއެޗްއޯގެ ޑިރެކްޓަރ ޖެނެރަލް ޑރ. ޓެޑްރޮސް އަދަނޮމް ގެބްރެޔެސަސް ވިދާޅުވިއެވެ.
ވެކްސިންގެ ސަޕްލައި މަދުވުމާއި، އިންސާފުވެރި ގޮތެއްގައި ބެހުމަށްޓަކައި، ޑަބްލިއުއެޗްއޯ އިން ވަނީ “އެކްސެސް އެންޑް އެލޮކޭޝަން މެކޭނިޒަމް” އެއް އުފެއްދުމަށް އިއުލާނުކޮށްފައެވެ. މި މަޝްރޫއުގެ މަޤްސަދަކީ މަންކީޕޮކްސްގެ ޓެސްޓުތަކާއި، ފަރުވާތަކާއި އަދި ވެކްސިންތައް އެންމެ ބޮޑަށް އަސަރުކުރާ ޤައުމުތަކަށް އިސްކަންދީގެން ފޯރުކޮށްދިނުމެވެ.
ޑަބްލިއުއެޗްއޯ އިން ވަނީ 18 އަހަރުން މަތީގެ މީހުންނަށް ދެ ޑޯޒުގެ އެމްޕޮކްސް ވެކްސިންގެ ހުއްދަ ދީފައެވެ. މިވަގުތު 18 އަހަރުން ދަށުގެ ކުދިންނަށް މި ވެކްސިން ދިނުމަށް ލަފާއެއް ނުދެއެވެ. ނަމަވެސް ބަލި ފެެތުރެމުންދާ ހާލަތްތަކުގައި، ވެކްސިންގެ ފައިދާ އޭގެ ނުރައްކަލަށްވުރެ ބޮޑުވާނަމަ، ކުޑަކުދިންނާއި ޅަފުރައިގެ ކުދިންނަށް މި ވެކްސިން ދެވިދާނެއެވެ.
ޑަބްލިއުއެޗްއޯ އިން ވަނީ މަދު މިންވަރުގެ ސަޕްލައި އިތުރު ބަޔަކަށް ފޯރުކޮށްދިނުމަށްޓަކައި، އެއް ޑޯޒު ދިނުމަށް ހުށަހަޅާފައެވެ. ނަމަވެސް އެއް ޑޯޒު ދިނުމުން ކިހާ ރަނގަޅަށް މަސައްކަތްކުރާނެކަން ބެލުމަށް އިތުރު މައުލޫމާތު ބޭނުންވާކަން ފާހަގަކޮށްފައިވެއެވެ.
2024 ވަނަ އަހަރުގެ އޯގަސްޓު 14 ވަނަ ދުވަހު، ޑަބްލިއުއެޗްއޯގެ ޑިރެކްޓަރ ޖެނެރަލް ވަނީ ކޮންގޯ ޑިމޮކްރެޓިކް ރިޕަބްލިކްގައާއި އެހެން ޤައުމުތަކުގައި އެމްޕޮކްސް އިތުރުވަމުންދާތީ، މިއީ ބައިނަލްއަޤްވާމީ ކަންބޮޑުވުމެއްގެ ގޮތުގައި ސިއްޙީ ކުއްލި ނުރައްކަލުގެ ހާލަތެއް ކަމުގައި އިއުލާނުކޮށްފައެވެ.
2022 ވަނަ އަހަރު ދުނިޔޭގައި މި ބަލި ފެތުރެން ފެށީއްސުރެ، 120 އަށްވުރެ ގިނަ ޤައުމުތަކުން 103,000 އަށްވުރެ ގިނަ އެމްޕޮކްސް ކޭސްތައް ރިޕޯޓުކޮށްފައިވެއެވެ. މި އަހަރުގެ ސެޕްޓެމްބަރު 8 ވަނަ ދުވަހާ ހަމައަށް، އެފްރިކާ އާއި ޔޫރްޕްގެ 14 ޤައުމެއްގައި 25,237 ޝައްކުކުރެވޭ އަދި ކަށަވަރުކުރެވިފައިވާ ކޭސްތައް ރިޕޯޓުކުރެވި، 723 މަރު ވެފައިވެއެވެ.