ކުންފުނިތަކުގެ ޚާއްޞަ އާންމު ޖަލްސާ ބޭއްވުމަށް ދޭ މުއްދަތު ކުރުކުރުމަށް ހުށަހަޅާފައިވާ އިޞްލާޙު، މާދަމާ ބޭއްވުމަށް ހަމަޖެހިފައިވާ ރައްޔިތުންގެ މަޖިލީހުގެ ދައުރުން ބޭރުގެ ޖަލްސާއަށް އެޖެންޑާ ކޮށްފިއެވެ. މި އިޞްލާޙު ރައްޔިތުންގެ މަޖިލީހަށް ސަރުކާރުގެ ފަރާތުން ހުށަހެޅުއްވީ ފޭދޫ އުތުރު ދާއިރާގެ މެންބަރު އިސްމާޢީލް ނިޒާރެވެ.
މި އިޞްލާޙުގެ މައިގަނޑު މަޤްޞަދަކީ ކުންފުންޏެއްގެ ޚާއްޞަ އާންމު ޖަލްސާ ބޭއްވުމަށް ފުރިހަމަ ކުރަންޖެހޭ އިޖުރާޢަތްތަކަށް ބަދަލު ގެނައުމެވެ.
މިހާރު ހުށަހަޅާފައިވާ އިޞްލާޙުގައިވާ ގޮތުން، ކުންފުންޏެއްގެ ޚާއްޞަ އާންމު ޖަލްސާއެއް ބާއްވަން އެދިއްޖެ ހާލަތެއްގައި، ޖަލްސާ ބޭއްވުމަށް އެދި ލިޔުން ލިބޭތާ 3 ދުވަހުގެ ތެރޭގައި ޖަލްސާއަށް ދަޢުވަތު ދޭންޖެހެއެވެ. އަދި 10 ދުވަހުގެ ތެރޭގައި ޖަލްސާ ބާއްވަން ޖެހޭނެއެވެ.
މިހާރު ޤާނޫނުގައި އޮންނަ ގޮތުން، ޖަލްސާ ބޭއްވުމަށް ދަޢުވަތު ދޭން ޖެހެނީ ލިޔުން ލިބޭތާ 21 ދުވަހުގެ ތެރޭގައެވެ. އަދި ޖަލްސާ ބޭއްވުމަށް 3 މަސް ދުވަހުގެ މުހުލަތެއް ދީފައި އޮވެއެވެ. މީގެ އިތުރުން، އައު އިޞްލާޙުގައި ކުންފުންޏެއްގެ ޚާއްޞަ އާންމު ޖަލްސާއެއް ބާއްވާނަމަ ކުންފުނީގެ މެންބަރުންނަށް 7 ދުވަސް ކުރިން ނޯޓިސް ފޮނުވުމަށްވެސް ހިމަނާފައިވެއެވެ.
މި އިޞްލާޙުގެ ފުރަތަމަ ކިޔުން މަޖިލީހުގެ ދައުރުން ބޭރުގައި ބޭއްވި ފުރަތަމަ ޖަލްސާގައި ވަނީ އިއްވާފައެވެ. މި އިޞްލާޙު ފާސްވެއްޖެނަމަ، ކުންފުނިތަކުގެ ޚާއްޞަ އާންމު ޖަލްސާތައް އަވަސް މުއްދަތެއްގެ ތެރޭގައި ބޭއްވުމަށް މަގުފަހިވެގެންދާނެއެވެ.