ރައްޔިތުންގެ މަޖިލީހުގައި މިއަދުގެ ޖަލްސާގައި ދުންފަތް ކޮންޓްރޯލްކުރުމާބެހޭ ގާނޫނަށް އިސްލާހުތައް ގެނައުމުގެ ބިލަށް ބަހުސްކުރަން ފަށައިފިއެވެ.
މި ބިލަކީ ސަރުކާރުގެ ފަރާތުން ހުށަހެޅި ދިވެހިރާއްޖޭގެ އެކްސްޕޯޓް އިމްޕޯޓުގެ ގާނޫނަށް އިސްލާހު ގެނައުމުގެ ބިލެވެ.
މި ބިލް މަޖިލީހަށް ހުށަހެޅުއްވީ މައްޗަންގޯޅި އުތުރު ދާއިރާގެ މެމްބަރު އިބްރާހިމް މުހައްމަދެވެ. ބިލް ހުށަހަޅުއްވަމުން އިބްރާހިމް މުހައްމަދު ވިދާޅުވީ މިއީ ވަރަށް މުހިންމު އިސްލާހެއް ކަމަށެވެ.
އަދި މި އިސްލާހު ހުށަހެޅުމުގެ މައިގަނޑު މަގްސަދަކީ ދުންފަތާއި، ދުންފަތުން ތައްޔާރުކޮށްފައި ހުންނަ ބާވަތްތަކާއި، ދުންފަތުގެ ބަދަލުގައި ބޭނުންކުރާ ބާވަތްތަކުން ނަގަމުން އަންނަ އިމްޕޯޓް ޑިއުޓީ ޓެކްސްގެ މިންވަރު އިތުރުކުރުން ކަމަށް އިބްރާހިމް މުހައްމަދު ވިދާޅުވިއެވެ. މީގެ އިތުރުން، އިލެކްޓްރޯނިކް ސިގިރޭޓާއި ވޭޕް ކުރުމަށް ބޭނުންކުރާ އާލާތްތައް ރާއްޖެއަށް އެތެރެކުރުން މަނާކުރެވޭ ތާރީޚާ ހަމައަށް، މި މުއްދަތުގައި ރާއްޖެއަށް ގެނެވޭ މިފަދަ ތަކެތިން ނަގާ އިމްޕޯޓް ޑިއުޓީގެ މިންވަރު އިތުރުކުރުން ކަމަށްވެސް އޭނާ ވަނީ ވިދާޅުވެފައެވެ.
އިބްރާހިމް މުހައްމަދު އިތުރަށް ވިދާޅުވީ، ސަރުކާރުން ވޭޕް މަނާކުރުމަށް ނިންމާފައިވާ ދަނޑިވަޅެއްގައި ބައެއް ފަރާތްތަކުން ސުވާލު އުފައްދާފައިވާ ކަމަށެވެ. އެގޮތުން، މަނާކުރުމުގެ ކުރިން މި ތަކެތިން ޑިއުޓީ ނެގުމާ ގުޅޭގޮތުން ސުވާލު ކުރެވިފައިވާ ކަމަށް އޭނާ ފާހަގަކުރެއްވިއެވެ.
މި ބިލުގެ މަގްސަދުތަކުގެ ތެރޭގައި، ވޭޕް ބޭނުންކުރާ މީހުންނާއި، އެފަދަ އާލާތްތަކުން ދައުލަތަށް އާމްދަނީ އިތުރުކޮށް ސަރުކާރަށް ނަފާވާނެ ގޮތް ހޯދުން ހިމެނޭކަމަށްވެސް އިބްރާހިމް މުހައްމަދު ވިދާޅުވިއެވެ.
ވޭޕާއި އެއާ ގުޅޭ ތަކެތި މަނާކުރަން ސަރުކާރުން ނިންމާފައިވަނީ މިދިޔަ ހޯމަ ދުވަހުގައެވެ. އެކަން އިއުލާނުކުރައްވައި ރައީސް ޑރ. މުހައްމަދު މުއިއްޒު ވިދާޅުވީ، ވޭޕްކުރުމަށް ބޭނުންކުރާ ތަކެއްޗާއި، އެ ތަކެތީގެ ވަކިވަކި ބައިތައް އެތެރެކުރުން އަންނަ ނޮވެމްބަރު މަހުގެ 15 ވަނަ ދުވަހުން ފެށިގެން މަނާވާނެ ކަމަށާއި، ރާއްޖޭގައި ވޭޕްކުރުމަށް ބޭނުންކުރާ ތަކެތި ބޭނުންކުރުމާއި، ގެންގުޅުމާއި، އުފެއްދުމާއި، ވިއްކުމާއި، ރާއްޖޭގައި އިޝްތިހާރު ކުރުމާއި ހިލޭބެހުން އޭގެ މަހެއްހާ ދުވަސް ފަހުން މަނާވާނެ ކަމަށެވެ.
އެހެންކަމުން ވޭޕް މަނާކުރުމަށް ސަރުކާރުން ނިންމި ނިންމުން ރަސްމީކޮށް ތަންފީޒުކުރެވެން ފެށޭނީ ޑިސެމްބަރު މަހުގެ 15 ވަނަ ދުވަހުން ފެށިގެންނެވެ.