ރާއްޖޭގެ އިޤްތިޞާދީ ސަރަޙައްދު ބެލެހެއްޓުމުގެ މަސައްކަތަށް ތުރުކީން ގެނައި އަސްކަރީ ތިން ޑްރޯންގެ ބޭނުން ހިފަމުން ގެންދޭތޯ ބެލުމަށް ދިފާޢީ ވަޒީރު ޣައްސާން މައުމޫން މަޖިލީހަށް ހާޒިރުކޮށް ސުވާލުކުރަން ހުށަހަޅައިފިއެވެ.
މި ހުށަހެޅުން ހުށަހެޅުއްވީ ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެންބަރު މީކާއިލް އަޙްމަދު ނަސީމެވެ.
މިކަމަށް އެދި މީކާއިލް ކުރެއްވި ސުވާލުގައި ވަނީ ސިފައިންގެ ޚިދުމަތުގައި ބޭނުން ކުރުމަށް 570 މިލިއަނެއްހާ ރުފިޔާ ޚަރަދުކޮށްގެން ގެނައި ޑްރޯންތައް އޮޕަރޭޓު ކުރަން ފެށިފައިވޭތޯއާއި، ފަށާފައިވާނަމަ މިހާތަނަށް ބޭނުން ކުރެވިފައިވަނީ ކޮން ބޭނުމެއްގައިތޯ ސާފުކުރުމަށް އެދިވަޑައިގެންފައެވެ.
މިދިޔަ މާރިޗު މަހު މާފަރު އެއަރޕޯޓުގައި ބޭއްވުނު ބޮޑު ރަސްމިއްޔާތެއްގައި ތުރުކީން ރާއްޖެއަށް ގެނައި “ބައިރަކްތާރު ޓީބީ2” ގެ ތިން ޑްރޯން ބޭނުންކުރަން ފެށިއެވެ. މި ޑްރޯންތަކަކީ 27 ގަޑިއިރަށް ވުރެ ގިނައިރު 25،000 އަށް ވުރެ ގިނަ ފޫޓު މަތިން އުދުއްސޭ، 70 އާއި 120 ނޮޓުގެ ސްޕީޑުގައި ދުއްވުމުގެ ޤެ ޤާބިލުކަން ލިބިފައިވާ އުޅަނދުތަކެކެވެ.