ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ބައްޕާފުޅުގެ ތަރިކައިން ދޮންމަންމާފުޅަށް އެއްވެސް އެއްޗެއް ނުދޭކަމަށް ބުނެ ފަތުރަމުންދާ ވާހަކަތަކަކީ ޙަޤީޤަތާ ޚިލާފު، ސިޔާސީ ބޭނުމަށް ފަތުރާ ދޮގު ވާހަކަތަކެއްކަމަށް ރައީސް ވިދާޅުވެއްޖެއެވެ.
ރައީސް މި ވާހަކަ ދެއްކެވީ މީސް މީޑިޔާގައި މި މައްސަލައާ ގުޅޭގޮތުން ފަތުރަމުންދާ ވާހަކަތަކުގެ ޙަޤީޤީ މަޢުލޫމާތު ހިއްސާކުރެއްވުމުގެ ގޮތުންނެވެ.
ރައީސް ވިދާޅުވީ ބައްޕާފުޅު އަވަހާރަވުމަށްފަހު ތަރިކަ ބެހުމުގެ ކަންކަން ކުރިއަށް ގެންދިޔައީ ޝަރުޢީ ކޯޓުގެ މަރުޙަލާއިންކަމަށެވެ. އެގޮތުން، ބައްޕާފުޅުގެ ސްރީލަންކާގައި ހުރި މުދަލުގެ ތަފްސީލު ހާމަކުރައްވަމުން ރައީސް ވިދާޅުވީ ކޮލޮމްބޯގައި ދެ ބިމާއި ކެންޑީގައި އެއް ބިން ހިމެނޭހެން ޖުމްލަ ތިން ބިމެއް އޮތްކަމަށެވެ. މީގެ ތެރެއިން ދެ ބިމެއްގައި ގެސްޓްހައުސް ހަދައި ވިޔަފާރި ފަށާފައިވާ ކަމަށާއި، އަނެއް ބިމުގައި ހުރި ޢިމާރާތަކީ ދިރިއުޅުމަށް ހަދާފައިވާ ތަނެއްކަމަށް ރައީސް ވިދާޅުވިއެވެ.
“ލަންކާގައި ހުރި ތިން ގޯއްޗާއި ޢިމާރާތާއި ހުރިހާ އެއްޗެއް ފައިސާއާއެކު އެހުރީ ދޮންމަންމައަށް ދީފައި. އިތުރަށް ކުރި އެއްވެސް ކަމެއް ނޯންނާނެ. އަޅުގަނޑުގެ ބޮލުގައި އަޅުވަން ދައްކާ އެއްވެސް ވާހަކަތަކަކީ އަޅުގަނޑާ ގުޅިފައިވާ ވާހަކަތަކެއް ނޫން,” ރައީސް ވިދާޅުވިއެވެ.
މީގެ އިތުރުން، ރައީސް ހާމަކުރެއްވި ގޮތުގައި ދޮންމަންމާފުޅު ވަނީ މާލެއިން ލިބިވަޑައިގަންނަވާ ތަރިކައިގެ ބައިކުޅަބައި ރައީސްއަށް ދޫކޮށްލައްވާފައެވެ.
“ދޮންމަންމަ ވިދާޅުވި މާލޭގައި ހުވަފަތް އަންހެނަކަށްވާތީ ދީނީގޮތުން އޮންނަ ބައިކުޅަބައި އެއްކޮށް އަޅުގަނޑަށް ދޫކޮށްލާނަމޭ. އެހެންވީމާ، އެއީ ނިންމި ނިންމުމަކީ. އެގޮތަށް ނިންމައިގެން ތަރިކަ ބަހާ ނިންމާފައި އެއޮތީ,” ރައީސް ވިދާޅުވިއެވެ.
މި މައްސަލައާ ގުޅިގެން ފާއިތުވި އަހަރުގެ ރިޔާސީ އިންތިޚާބާ ދިމާކޮށް ބައެއްާކޮށް ބައެއް މީޑިއާތަކުން ވަނީ ބޮޑެތި ތުހުމަތުތަކެއް ރައީސްގެ މައްޗަށް ކޮށްފައެވެ. ނަމަވެސް ރައީސް ވަނީ މި ތުހުމަތުތައް ކުރީއްސުރެ ދޮގުކުރައްވާފައެވެ.
ރައީސް ވިދާޅުވަނީ މިއީ އެމަނިކުފާނުގެ އަގު ވައްޓާލުމަށް ސިޔާސީ ބޭނުމަށް ފަތުރާ ދޮގު ވާހަކަތަކެއް ކަމަށެވެ.
ރައީސް އިތުރަށް ފާހަގަކުރެއްވި ގޮތުގައި އެމަނިކުފާނަކީ އެއްވެސް އިރެއްގައި މީހެއްގެ ޒާތީ ވާހަކަތައް ދައްކާ ބޭފުޅެއް ނޫނެވެ.
“އަޅުގަނޑަކީ އެއްވެސް އިރެއްގައި މީހެއްގެ ޒާތީ ވާހަކަތައް ދައްކާ މީހެއް ނޫން. ދައްކާނަމަ އަބަދުވެސް ދައްކާނީ އެމީހެއްގެ ރަނގަޅު ވާހަކަތައް,” ރައީސް ވިދާޅުވިއެވެ.
އަދި މި މައްސަލައިގައި ޢާއިލީ ޒާތީ ކަންކަމުގެ ތަފްސީލު ވާހަކަތައް ހިއްސާކުރަން ވަރަށް ދަތިކަން ފާހަގަކުރައްވަމުން ރައީސް ވިދާޅުވީ، އެ ވަރަށްވެސް ބުނަން ބޭނުންނުވަނީ އެއީ، ޒާތީ ވާހަކަ ދެއްކުމަކީ ރައީސްގެ މިޒާޖުގައި ހުންނަ ކަމަކަށް ނުވާތީ ކަމަށެވެ.
ރައީސް މުޢިއްޒު އިތުރަށް ވިދާޅުވީ މި މައްސަލައިގައި އެމަނިކުފާނުގެ އިސްތަށިފުޅުގައި އަޅުވާ ހުރިހާ ވާހަކަތަކަކީވެސް ދޮގު ވާހަކަތަކެއް ކަމަށެވެ. އަދި މިއާ ޚިލާފަށް އެމަނިކުފާނު ކޮށްފައިވާ އެއްވެސް ކަމެއް ނޯންނާނެ ކަމަށްވެސް ވިދާޅުވިއެވެ.