މިއަދުގެ ހުކުރު ޚުޠުބާގައި ވަރިކުރުމާއި ޢިއްދާއާ ބެހޭ އިސްލާމީ ޙުކުމްތަކާ ބެހޭގޮތުން ގިނަ މަޢުލޫމާތު ދީފިއެވެ. މިއަދު ޚުޠުބާގައި ޚާއްޞަ ކޮށްފައިވަނީ “ވަރިކުރުމާއި ޢިއްދާއާ ބެހޭ ޙުކުމް”ތަކުގެ މައްޗަށެވެ.
ޙުތުބާގައި ވަނީ ވަރި އާއި އޭގެ ބާވަތްތައް ގެނެސްދީފައެވެ. އެގޮތުން ވަރީގެ މައިގަނޑު ދެ ބާވަތް ކަމުގައިވާ ރަޖުޢީ ވަރިއާއި ބާއިނު ވަރިއާ ބެހޭ މަޢުލޫމާތުވެސް ޚުޠުބާގައި ހިމެނިފައިވެއެވެ. އަދި ވަރިކުރުން ހުއްދަވާ ސަބަބުތަކުގެ ތެރޭގައި އަނބިމީހާގެ އަޚްލާޤު ނުބައިވުމާއި، ޒަވާޖީ ޙަޔާތުގެ އިންތަކުން ބޭރުވުން ފަދަ ކަންކަން ހިމެނޭކަން ފާހަގަކުރެއްވިއެވެ.
އަދި ހަމަ އެ ފަދައިން ފިރިމީހާ އަނބިމީހާގެ މައްޗަށް އަނިޔާވެރިވެ، އޭނާގެ ޙައްޤުތައް އަދާނުކުރާ ނަމަ، އަނބިމީހާއަށް ކައިވެނި ޚުލްޢުކުރުމަށް ހުށަހެޅުން ހުއްދަވާކަމާއި އެ ފަދަ ޙާލަތެއްގައި ފިރިމީހާ އޭނާއަށް ދިން ކައިވެނީގެ ރަން އަނބުރައި ދޭން ޖެހޭނެކަން ޙުތުބާގައި ވަނީ ފާހަގަކޮށްފައެވެ.
ޚުޠުބާގައި ވަނީ، ޢިއްދައިގެ މުއްދަތުގައި އަނބިމީހާ ފިރިމީހާއަށް ކިޔަމަންވާންޖެހޭކަމަށް ބުނެފައެވެ. އަދި ފިރިމީހާ އަނބިމީހާ ދިރިއުޅޭނެ ތަނަކާއި ޚަރަދު ހަމަޖައްސައިދޭންޖެހެއެވެ. މީގެ އިތުރުން، ފުރަތަމަ ފަހަރާއި ދެވަނަ ފަހަރު ކުރާ ވަރީގެ ޢިއްދައިގެ ތެރޭގައި، ފިރިމީހާއަށް އަނބިމީހާ ރުޖޫޢަކުރުމުގެ ޙައްޤު ލިބިގެންވާކަން ބަޔާންކޮށްފައިވެއެވެ.
ޚުޠުބާގައި އަލިއަޅުވާލާފައިވާ އެހެން މުހިންމު ނުކުތާއެއްގެ ގޮތުގައި، ކައިވެންޏާއި ވަރީގެ ކަންކަން ކޯޓުތަކުގައި ރަޖިސްޓްރީކޮށް ބެލެހެއްޓުމުގެ މުހިންމުކަން ފާހަގަކޮށްފައިވެއެވެ. މިއީ ޢާއިލާތަކުގެ ޙައްޤުތައް ރައްކާތެރިކުރުމަށް ކޮންމެހެން ބޭނުން ކަމެއްގެ ގޮތުގައި ޙުތުބާގައި ވަނީ ބުނެފައެވެ.
ޢިއްދައިގެ މުއްދަތާ ބެހޭގޮތުން ވެސް ޚުޠުބާގައި މަޢުލޫމާތު ދީފައިވެއެވެ. ޙައިޟުވާ އަންހެނުންގެ ޢިއްދައަކީ ތިން ޤުރުއު (ޠުހުރު) ކަމަށާއި، ޙައިޟުވުން ހުއްޓިފައިވާ އަންހެނުންނާއި ޙައިޟުނުވާ އަންހެނުންގެ ޢިއްދައަކީ ތިން މަސްދުވަސް ކަމަށްވެސް ބުނެފައިވެއެވެ.
މި ޚުޠުބާގައި ޖުމްލަގޮތެއްގައި ވަނީ އިސްލާމްދީނުގައި ކައިވެންޏާއި ވަރިއާ ބެހޭ ގޮތުން ކަނޑައެޅިފައިވާ ޙުކުމްތަކުގެ މުހިންމުކަމާއި، ޢާއިލާތަކުގެ ޙައްޤުތައް ރައްކާތެރިކުރުމުގެ މުހިންމުކަމުގެ މައްޗަށް އަލިއަޅުވާލާފައެވެ.