ރާއްޖޭގައި އާބަން ސެންޓަރުތައް ތަރައްޤީކުރުމުގެ މަސައްކަތް ކުރިއަށް ގެންދަނީ ހުރިހާ ފަރާތްތަކެއްގެ ލަފަޔާއި މަޝްވަރާގެ މަތިން ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. މިކަން ރައީސް ފާހަގަކުރެއްވީ މިއަދު އެކްސްގައި ކުރެއްވި ޕޯސްޓެއްގައެވެ.
ރައީސް މުޢިއްޒު ވިދާޅުވި ގޮތުގައި، ސަރުކާރުގެ މެނިފެސްޓޯގައި ވަރަށް ސާފުކޮށް ބަޔާންކޮށްފައިވާ ފަދައިން، ދެމެހެއްޓެނިވި ސަރަޙައްދީ ތަރައްޤީގެ ސިޔާސަތުގެ ދަށުން މާލެ އަރބަން ރީޖަންގެ އިތުރުން އެންމެ މަތީ ފަންތީގެ ޚިދުމަތްތައް ހިމެނޭހެން، އުތުރުގެ ތިން އަތޮޅު ހިމެނޭ ނޮރދަން އިންޓަގްރޭޓަޑް ޑިވެލޮޕްމަންޓް ޕްމަންޓް ޒޯނަކާއި ދެކުނުގެ ހަތަރު އަތޮޅު ހިމެނޭ ސަދަން އިންޓަގްރޭޓަޑް ޑިވެލޮޕްމަންޓް ޒޯނެއް ތަރައްޤީކުރުމަށް ވަނީ ރޭވިފައެވެ.
މީގެ އިތުރުން، މާލެއިން އުތުރުގައި ތިނެއް އަދި ދެކުނުގައި ހަތަރު އަރބަން ސެންޓަރު ތަރައްޤީކުރުމަކީ ސަރުކާރުގެ ސިޔާސަތު ކަމަށް ރައީސް ފާހަގަކުރެއްވިއެވެ. އަދި މިއީ ކުރިއަށް އޮތް 20 އަހަރަށް އެކުލަވާލަން މަސައްކަތް ފަށާފައިވާ ތަރައްޤީގެ މާސްޓަރ ޕްލޭންގައި ހިމެނޭ ކަންކަން ކަމަށްވެސް ވިދާޅުވިއެވެ.
ރައީސް މުޢިއްޒު އިތުރަށް ވިދާޅުވި ގޮތުގައި، މި މާސްޓަރ ޕްލޭން އެކުލަވާލުމުގައި ރާއްޖޭގެ ހުރިހާ ރަށެއްގެ ރައްޔިތުންގެ ޚިޔާލާއި، ފަންނީ ފަރާތްތަކާއި ކައުންސިލްތަކާއި ކަމާބެހޭ ހުރިހާ ފަރާތްތަކެއްގެ ބައިވެރިވުން ހޯދުމަށް ވަނީ ރޭވިފައެވެ.
ނަމަވެސް، ބައެއް ސިޔާސީ ފަރާތްތަކުން ކަންކަމުގެ ޙަޤީޤަތް ނުބަލައި، ނުވަތަ ޙަޤީޤަތް އެނގިހުރެ، ސިޔާސީ ފައިދާ ހޯދުމުގެ ނިޔަތުގައި ދޮގު މަޢުލޫމާތު ފަތުރަމުންދާ ކަމަށް ރައީސް ފާހަގަކުރެއްވިއެވެ. އަދި މިފަދަ ޢަމަލުތަކަށް ޒިންމާވާނީ އެކަންކަން ކުރާ ފަރާތްތައް ކަމަށްވެސް ރައީސް ވިދާޅުވިއެވެ.
ރައީސް މިފަދައިން ޕޯސްޓު ކުރައްވައިފައި ވާއިރު، އާބަން ސެންޓަރު ކަނޑައެޅުމުގައި ބޮޑުތިލަދުންމައްޗާއި، ރާއްޖޭގެ ދެކުނުގެ ސަރަހައްދު އުނިވެފައިވާ ސަބަބު އެސަރަހައްދު ތަކުގައި ދިރިއުޅޭ ރައްޔިތުންނަށް ސަރުކާރުން ސާފުކޮށްދޭންޖެހޭ ކަމަށްބުނެ އެމްޑީޕީގެ ރައީސް އަބްދުﷲ ޝާހިދު ވަނީ އެކްސްގައި ޕޯސްޓުކުރައްވާފައެވެ.