ރާއްޖެއަށް ދުންފަތުގެ ބާވަތްތައް އެތެރެކުރުމާ ބެހޭ ގަވާއިދަށް ބޮޑު ބަދަލެއް ގެނެސް، ފަތުރުވެރިންނަށް އަމިއްލަ ބޭނުމަށް ގެނެވޭ މިންވަރު ވަރަށް ބޮޑަށް މަދުކޮށްފިއެވެ. ކަސްޓަމްސްއިން ހާމަކުރި ގޮތުގައި މި އައު ގަވާއިދު ނޮވެމްބަރު 9 އިން ފެށިގެން ޢަމަލުކުރަން ފަށާފައިވެއެވެ.
މި އައު ގަވާއިދުގެ ދަށުން، ފަތުރުވެރިކަމުގެ ވިސާގައި އަންނަ ފަރާތްތަކަށް އެކަނި ދުންފަތުގެ ބާވަތްތައް ގެނެވޭނެއެވެ. އެގޮތުން ގެނެވޭނީ 200 ސިނގިރޭޓް، ނުވަތަ 25 ސިގާރު، ނުވަތަ 250 ގްރާމް ޓޮބެކޯއެވެ. މި އަދަދަށްވުރެ އިތުރަށް ގެންނަ ތަކެތި 30 ދުވަހުގެ މުއްދަތަށް ކަސްޓަމްސްއިން ހިފަހައްޓާނެއެވެ.
ފަތުރުވެރިން ފިޔަވައި އެހެން ފަރާތްތަކުން ގެންނަ ދުންފަތުގެ ބާވަތްތައް ހިފެހެއްޓޭނެ ކަމަށް ކަސްޓަމްސްއިން ވަނީ ކުރިން އިޢުލާނުކޮށްފައެވެ. މީގެ އިތުރުން، ރާއްޖޭގައި ދުންފަތުގެ ބާވަތްތައް ބޭނުންކުރުމާއި ވިއްކުމުގެ ގަވާއިދުތައް ހަރުކަށިކޮށް، މިފަދަ ތަކެތިން ނަގާ ޓެކްސް ވަނީ ބޮޑުތަނުން އިތުރުކޮށްފައެވެ.
މި ބަދަލުތަކަކީ ރާއްޖޭގައި ދުންފަތުގެ ބޭނުންކުރުން މަދުކުރުމަށް ސަރުކާރުން އަޅަމުންދާ ފިޔަވަޅުތަކުގެ ތެރެއިން ބައެއް ކަމަށް ބެލެވެއެވެ.