މި ސަރުކާރުން ފުށިދިއްގަރުފަޅު ހިއްކައިގެން ތަރައްޤީ ކުރަން ނިންމާފައިވާ ރަސްމާލެ އަލުން ހިއްކަން ފަށައިފިއެވެ.
މާލެ ކައިރީގައި އޮންނަ ފުށިދިއްގަރު ފަޅު ހިއްކައިގެން ތަރައްގީކުރާ ރަސްމާލެ ހިއްކުމުގެ މަސައްކަތް ފެށީ މިދިިޔަ އަހަރު ޑިސެމްބަރު މަހު އެވެ.
ރަސްމާލެ ހިއްކުމުގެ މަސައްކަތް 70 ހެކްޓަރުގެ ބިން ދިގު މުއްދަތަކަށް ދޭގޮތަށް ފުރަތަމަ ހަވާލުކުރީ ސްރީލަންކާގެ ކެޕިޓަލް މެރިން އެންޑް ސިވިލް ކޮންސްޓްރަކްޝަން ކޮމްޕެނީ (ސީއެމްސީސީ) އާ އެވެ. އެ މަސައްކަތް މިދިޔަ އަހަރުގެ ޑިސެމްބަރު މަހުގެ 18 ވަނަ ދުވަހު ފެށީ އަށް މަސް ދުވަހުގެ ތެރޭގައި ނިންމާ ގޮތަށެވެ. ނަމަވެސް އެ ކުންފުންޏަށް ބިން ދޫކޮށްގެން މަޝްރޫއުގެ މަސައްކަތް ކުރިއަށް ގެންދިއުމަށް ބޭނުންނުވާތީ އެ އެއްބަސްވުން ސަރުކާރުން ވަނީ އުވާލާފަ އެވެ.
އަދި އެ މަޝްރޫއު ކުރިއަށް ގެންދަން އިތުރު ގޮތްތަކެއް ހޯދަމުންދާކަަމަށް ސަރުކާރުން އޭރު އޮތީ ބުނެފަ އެވެ.
ހައުސިން ޑިވޮލޮޕްމަންޓް ކޯޕަރޭޝަނުން މިއަދު މެންދުރު ބުނީ ރަސްމާލެ ހިއްކުމުގެ މަސައްކަތް މިއަދު އަލުން ފަށާފައިވާ ކަމަށެވެ. ރަސްމާލެ މަޝްރޫއުގެ ދަށުން 1،153 ހެކްޓަރުގެ ބިން އަށް މަސް ދުވަހުގެ ތެރޭގައި ހިއްކަން ހަމަޖެހިފައިވެ އެވެ.