ދިވެހިރާއްޖޭގެ ތަޢުލީމީ ދާއިރާއަށް ކުރައްވާފައިވާ އަގުހުރި ޚިދުމަތްތަކަށް ޓަކައި، ދިވެހިރާއްޖޭގެ އިސްލާމީ ޔުނިވަރސިޓީގެ ޗާންސެލަރ ޑރ. މުޙައްމަދު ޒާހިރު ޙުސައިނަށް، ނިޝާން ޢިއްޒުއްދީނުގެ ޢިއްޒަތުގެ ވެރިޔާ (ނ.ޢ.ޢ.ވ) ގެ މަތިވެރި ޝަރަފު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އަރުވައިފިއެވެ.
ރޭ ދަރުބާރުގޭގައި ބޭއްވުނު ޖުމްހޫރީ ދުވަހުގެ ރަސްމީ ޖަލްސާގައި މި ޝަރަފު އެރުވުނީ، ދިވެހިރާއްޖޭގެ ތަޢުލީމީ ތަރައްޤީއަށާއި، ރާއްޖޭގައި ތަޢުލީމު ފުޅާކުރެއްވުމަށާއި، ތަޢުލީމީ ރޮނގުން ރާއްޖޭގެ ރައްޔިތުން ހޭލުންތެރިކުރުވުމަށް ޑރ. ޒާހިރު ކުރައްވާފައިވާ އިޚްލާޞްތެރި އަދި ގިނަގުނަ ޚިދުމަތްތަކުގެ އަގު ވަޒަންކުރުމުގެ ގޮތުންނެވެ.
ޑރ. ޒާހިރުގެ 48 އަހަރުގެ ދިގު މުއްދަތުގެ ޚިދުމަތުގެ ތެރޭގައި، އެމަނިކުފާނު ވަނީ ތަޢުލީމީ ދާއިރާގެ އެކި މަޤާމުތައް ފުރުއްވާފައެވެ. މީގެ ތެރޭގައި 10 އަހަރާއި 9 މަހަށްވުރެ ދިގު މުއްދަތަކަށް ތަޢުލީމީ ވަޒީރުކަން ކުރެއްވުން ހިމެނެއެވެ. އަދި 1979 ވަނަ އަހަރު ސައިންސް އެޑިޔުކޭޝަން ސެންޓަރު ހުޅުވުމާއި، އަސާސީ ތަޢުލީމުގެ މަޝްރޫޢު ހިންގެވުން ފަދަ މުހިންމު މަސައްކަތްތައް ކުރައްވާފައިވެއެވެ.
މީގެ އިތުރުން، ޑރ. ޒާހިރު ވަނީ ރައްޔިތުންގެ މަޖިލީހުގެ މެންބަރުކަމާއި، ކީރިތި ޤުރްއާން ދިވެހިބަހަށް ތަރުޖަމާކުރާ ކޮމިޓީގެ މެންބަރުކަން ކުރައްވާފައެވެ. އަދި ނޫސްވެރިކަމުގެ ދާއިރާއިންވެސް އެތައް އިނާމަކާއި ޝަރަފެއް ހޯއްދަވާފައިވެއެވެ.