މާލޭ ޕޯޓަށް އެތެރެކުރި ކޮންޓެއިނަރަކުން 3 ކިލޯއަށްވުރެ ގިނަ މަސްތުވާތަކެތި ފުލުހުން އަތުލައިގެންފިއެވެ. ފުލުހުންގެ ހިދުމަތުން ހާމަކުރެއްވި ގޮތުގައި މި އޮޕަރޭޝަން ކުރިއަށް ގެންދިޔައީ ކަސްޓަމްސްއިން ދިން މަޢުލޫމާތަކާ ގުޅިގެންނެވެ.
ފުލުހުންގެ ޑްރަގް އެންފޯސްމަންޓް ޑިޕާޓްމަންޓުން ހިންގި މި އޮޕަރޭޝަނުގައި، ކޮންޓެއިނަރު ބަލައި ފާސްކުރިއިރު މަސްތުވާތަކެތި ކަމަށް ބެލެވޭ އެއްޗެއް ހުރި 5 ރަބަރު ޕެކެޓު ފެނިފައިވާކަމަށް ބުނެފައިވެއެވެ. މި ތަކެތީގެ ޖުމްލަ ބަރުދަނަކީ 3.280 ކިލޯއެވެ.
ނަމަވެސް، އަތުލައިގަތް މަސްތުވާތަކެއްޗަކީ ކޮން ބާވަތެއްގެ އެއްޗެއްކަން އަދި ކޮން ފަރާތަކުން އެތެރެކުރި ކޮންޓެއިނަރެއްކަން ފުލުހުން ހާމަކޮށްފައެއް ނުވެއެވެ.
މި މައްސަލައާ ގުޅިގެން މިހާތަނަށް އެއްވެސް މީހަކު ހައްޔަރުކޮށްފައި ނުވާކަމަށާއި، މައްސަލައިގެ ތަޙްޤީޤު ދަނީ ކުރިއަށް ކަމަށް ފުލުހުން ބުނެފައިވެއެވެ.