ސަރުކާރުން ވަނީ ސިފައިންނާއި ފުލުހުންނަށާއި އެ މީހުންގެ އާއިލާތަކަށް މިހާރު ފޯރުކޮށްދެމުން އަންނަ ވަކި ލިމިޓެއް ނެތް ބޭސްފަރުވާގެ ސްކީމް އުވާލުމަށް ނިންމާފައެވެ. މީގެ ބަދަލުގައި ޕްރައިވެޓް އިންޝުއަރެންސް ޕެކޭޖެއް ތަޢާރަފުކުރުމަށް ސަރުކާރުން ވަނީ ނިންމާފައެވެ.
ފިނޭންސް މިނިސްޓްރީން ބުނެފައިވާ ގޮތުގައި މިހާރުގެ ނިޒާމުގެ ސަބަބުން ނާޖާއިޒު ފައިދާ ނެގުމުގެ ފުރުސަތު އެބައޮތެވެ. އަދި މިކަމުގެ ސަބަބުން އިސްރާފު އިތުރުވެ، އެންމެ ބޭނުން ޖެހިފައިވާ ފަރާތްތަކަށް އެކަށީގެންވާ އެހީތެރިކަން ފޯރުކޮށްދިނުމަށް ދަތިވާ ކަމަށް ވެސް ބުނެފައިވެއެވެ.
މިހާރުގެ ސްކީމުގެ ދަށުން ކޮސްމެޓިކް ޕްރޮސީޖަރތަކާއި ބައެއް ކޮންސިއުމަބަލްސް ވެސް ކަވަރުކުރެވޭ ކަމަށް މިނިސްޓްރީން ފާހަގަކޮށްފައިވެއެވެ. އަދި މި ސްކީމަށް މިއަހަރުގެ ނިޔަލަށް 321.7 މިލިއަން ރުފިޔާ ޚަރަދުވާނެ ކަމަށް ލަފާކޮށްފައިވެއެވެ.
އައު ބަދަލާއެކު، ސިފައިންނާއި ފުލުހުންނަށާއި އެ މީހުންގެ އާއިލާތަކަށް އެއްހަމައެއްގައި ޕްރައިވެޓް އިންޝުއަރެންސް ޕެކޭޖެއް ހަމަޖައްސައިދެވޭނެއެވެ. ނަމަވެސް، ވަޒީފާ އަދާކުރުމުގެ ތެރޭގައި ލިބޭ ގެއްލުންތަކަށް ދައުލަތުން ޚަރަދުކޮށްދޭނެ ކަމަށް ސަރުކާރުން ބުނެފައިވެއެވެ.
މި ބަދަލު އަންނަ އަހަރުގެ ކުރީކޮޅުން ފެށިގެން ގެނައުމަށް ވަނީ ރޭވިފައެވެ.