ދައުލަތުގެ ސިއްޙީ އިންޝުއަރެންސް ނިޒާމު، އާސަންދައަށް މުހިންމު ބަދަލުތަކެއް ގެނައުމަށް ސަރުކާރުން ނިންމައިފިއެވެ. މި ބަދަލުތަކުގެ ތެރޭގައި މުއްސަނދި ފަރާތްތަކުން ޚިދުމަތަށް ފައިސާ ނެގުމާއި، އިންކަމް ޓެކްސް ދައްކާ ފަރާތްތަކުން ޕްރީ-ޕޭމަންޓެއް ނެގުން ހިމެނެއެވެ.
އަންނަ އަހަރުގެ ބަޖެޓުގެ ރިކަރެންޓް ޚަރަދުގެ 5.1 އިންސައްތަ އާސަންދައަށް ޚަރަދުކުރުމަށް ވަނީ ކަނޑައަޅާފައެވެ. ނަމަވެސް، މި އައު ބަދަލުތަކާއެކު ދައުލަތުން އާސަންދައަށް ކުރާ ޚަރަދު ކުޑަވާނެ ކަމަށް ލަފާކުރެވެއެވެ.
އިތުރު ބަދަލުތަކުގެ ތެރޭގައި ޕްރައިވެޓް ހޮސްޕިޓަލްތަކާއި ފެސިލިޓީތަކުގައި ދެވޭ ޚިދުމަތްތަކަށް ޕެކޭޖް އަގުތަކެއް ކަނޑައެޅުން ހިމެނެއެވެ. މީގެ އިތުރުން، އަމިއްލަ އިންޝުއަރެންސް ލިބިފައިވާ ފަރާތްތަކަށް އެ އިންޝުއަރެންސްއިން ކަވަރުކުރާ އައުޓްޕޭޝަންޓް ޚިދުމަތްތަކަށް އާސަންދަ ނުދިނުމަށް ވެސް ވަނީ ނިންމާފައެވެ.
މި ބަދަލުތަކަކީ އާސަންދަ ނިޒާމު އިތުރަށް ހަރުދަނާކުރުމަށާއި، ދެމެހެއްޓެނިވި ގޮތެއްގައި ހިންގުމަށް އެޅޭ ފިޔަވަޅުތަކެއް ކަމަށް ސަރުކާރުން ބުނެފައިވެއެވެ.