އަންނަ އަހަރަށް ހުށަހަޅާފައިވާ ދައުލަތުގެ ބަޖެޓުގެ ބަހުސް މާދަމާގެ ނިޔަލަށް ކުރިއަށްގެންދަން މިއަދު ރައްޔިތުންގެ މަޖިލީހުން ފާސްކޮށްފިއެވެ. މި ގޮތުން ބަޖެޓުގެ ބަހުސްގައި ވާހަކަދައްކަން ބޭނުންވާ މެންބަރުން ވާހަކަދައްކާ ނިމެންދެން މިރޭ 11 އާ ހަމައަށް ވަގުތު އިތުރުކޮށް، މާދަމާ ވެސް ބަހުސް ކުރިއަށް ގެންދިއުމަށް ވަނީ ނިންމާފައެވެ.
މި ނިންމުން ފާސްކުރީ މަޖިލީހުގެ 52 މެންބަރުންގެ އިއްތިފާގުންނެވެ. އަންނަ އަހަރަށް ހުށަހަޅާފައިވާ ބަޖެޓުގެ ޖުމުލަ އަދަދަކީ 56.6 ބިލިއަން ރުފިޔާއެވެ. މީގެ ތެރެއިން ޚަރަދުގެ ގޮތުގައި ހިމެނެނީ 49.2 ބިލިއަން ރުފިޔާއެވެ. އަދި އާމްދަނީއާއި ހިލޭ އެހީގެ ގޮތުގައި ލަފާކޮށްފައިވަނީ 39.8 ބިލިއަން ރުފިޔާއެވެ.
ފާހަގަކޮށްލެވޭ ކަމަކީ މިއީ ފަހުގެ ތާރީޚެއްގައި ނިސްބަތުން އެންމެ ޑެފިސިޓް ކުޑަ ބަޖެޓު ކަމަށްވުމެވެ. މި ބަޖެޓުގެ ޑެފިސިޓަކީ 9.4 ބިލިއަން ރުފިޔާ ނުވަތަ އުފެއްދުންތެރިކަމުގެ ނިސްބަތުން 7.9 އިންސައްތައެވެ. މި އަހަރުގެ ބަޖެޓާ އަޅާބަލާއިރު އަންނަ އަހަރުގެ ބަޖެޓު 1.6 ބިލިއަން ރުފިޔާ ބޮޑުވާނެ ކަމަށް ލަފާކުރެވެއެވެ.
މީގެކުރިން ދައުލަތުގެ ބަޖެޓު ހުށަހެޅުމަށް ފަހު އެންމެ ފުރަތަމަ ވެސް ތަޅުމުގައި ބަހުސްކުރުން ކުރިއަށްގެންދެއެވެ. ނަމަވެސް މިފަހަރު އެންމެ ފުރަތަމަ ވަނީ ބަޖެޓު ކޮމިޓީއެއް އެކުލަވައިލާ، ބަޖެޓު ދިރާސާކުރުން ކުރިއަށް ގެންގޮސްފައެވެ. ތަޅުމުގައި މެންބަރުން ބަހުސްކުރަން ފެށީ އެއަށްފަހެވެ.