މޯލްޑިވްސް މީޑިއާ ކައުންސިލާއި މޯލްޑިވްސް ބްރޯޑްކާސްޓިންގ ކޮމިޝަން އުވާލައި، އޭގެ ބަދަލުގައި “މޯލްޑިވްސް މީޑިއާ އެންޑް ބްރޯޑްކާސްޓިންގ ކޮމިޝަން” ގެ ނަމުގައި އައު ކޮމިޝަނެއް އުފެއްދުމަށް ހުށަހަޅާ ބިލެއް ތުޅާދޫ ދާއިރާގެ މެންބަރު އަބްދުލްހަންނާން އަބޫބަކުރު ހުށަހަޅުއްވައިފިއެވެ.
މިއަދުގެ ޖަލްސާގައި ހުށަހެޅި މި ބިލުގައިވާ ގޮތުން، އައު ކޮމިޝަނުގައި ތިބޭނީ 7 މެންބަރުންނެވެ. އޭގެ ތެރެއިން 4 މެންބަރުން ޢައްޔަންކުރާނީ ރައްޔިތުންގެ މަޖިލީހުގެ ރުހުމާއެކު ރައީސުލްޖުމްހޫރިއްޔާއެވެ. އަދި 3 މެންބަރުން އިންތިޚާބުކުރާނީ މީޑިއާ ދާއިރާއިންނެވެ. ނަމަވެސް، ކޮމިޝަނުގެ ރައީސާއި ނައިބު ރައީސް ކަނޑައެޅުމުގެ ބާރު ލިބިގެންވަނީ ރައީސުލްޖުމްހޫރިއްޔާއަށެވެ.
މި ބިލުގެ މައިގަނޑު މަޤްޞަދުތަކުގެ ތެރޭގައި ނޫސްވެރިކަމުގެ މިނިވަންކަން ކުރިއެރުވުމާއި، ތަރައްޤީކުރުމާއި، އަދި ދެމެހެއްޓުން ހިމެނެއެވެ.
ބިލުގައި ހިމެނޭ މުހިންމު ބައެއް ކަންތައްތަކުގެ ތެރޭގައި:
ނޫސް މަޖައްލާތަކުގެ ރަޖިސްޓްރީ ބާޠިލުކުރެވޭނެ ޙާލަތްތައް
ބްރޯޑްކާސްޓްކުރުމުގެ ޚިދުމަތްދޭ ފަރާތްތަކުން ސުލޫކީ މިންގަނޑާ ޚިލާފުވުމުން އަޅާނެ ފިޔަވަޅުތައް
މީޑިއާގައި މަސައްކަތްކުރާ ފަރާތްތަކާއި ނޫސްވެރިންނަށް ކަނޑައެޅޭ ޖޫރިމަނާތައް ހިމެނެއެވެ.
މި ބިލު ފާސްވެއްޖެނަމަ، ރާއްޖޭގެ މީޑިއާ ދާއިރާއަށް ބޮޑެތި ބަދަލުތަކެއް އަންނާނެކަމަށް ބެލެވެއެވެ.