ވޭޕް އެތެރެކުރުމާއި، އޭގެ ވިޔަފާރިކުރުމާއި، ބޭނުންކުރުން މަނާކުރުމަށް ދުންފަތް ކޮންޓްރޯލް ކުރުމުގެ ޤާނޫނަށް އިޞްލާޙު ގެނައުމުގެ ބިލު ރައީސް ޑރ. މުޙައްމަދު މުއިއްޒު ރޭ ތަޞްދީޤުކުރައްވައިފިއެވެ. މި ބިލު ރައްޔިތުންގެ މަޖިލީހަށް ހުށަހެޅުއްވީ ސަރުކާރުގެ ފަރާތުން ހެންވޭރު އުތުރު ދާއިރާގެ މެންބަރު އަޙްމަދު އައިފާނެވެ.
ބުދަ ދުވަހު މަޖިލީހުން މި ބިލު ފާސްކުރީ 54 މެންބަރުންގެ ވޯޓުންނެވެ. އެއްވެސް މެންބަރަކު ބިލާ ދެކޮޅަށް ވޯޓު ނުދެއްވި ނަމަވެސް، 8 މެންބަރަކު ވަކި ގޮތަކަށް ވޯޓު ދޭން ބޭނުން ނުވާ ކަމަށް ވޯޓު ދެއްވިއެވެ.
މި ބިލުގެ ދަށުން، އަންނަ ހުކުރު ދުވަހުން ފެށިގެން ވޭޕް ކުރުމަށް ބޭނުންކުރާ ތަކެއްޗާއި އެ ތަކެތީގެ ވަކިވަކި ބައިތައް ދިވެހިރާއްޖެއަށް އެތެރެކުރުން މަނާވާނެއެވެ. އަދި އަންނަ މަހުގެ 15 ވަނަ ދުވަހުން ފެށިގެން ވޭޕް ކުރުމަށް ބޭނުންކުރާ ތަކެތި ރާއްޖޭގައި ބޭނުންކުރުމާއި، ގެންގުޅުމާއި، އުފެއްދުމާއި، ވިއްކުމާއި، އިޝްތިހާރުކުރުމާއި، ހިލޭ ބެހުން މަނާވާނެއެވެ.
މީގެ އިތުރުން، ކުޑަކުއްޖަކަށް އީ-ސިގަރެޓް ނުވަތަ ވޭޕް ކުރުމަށް ބޭނުންކުރާ އާލާތެއް ވިއްކައިފިނަމަ 50,000 ރުފިޔާއިން ޖޫރިމަނާކުރެވޭނެއެވެ.
ދުންފަތުގެ އިސްތިޢުމާލު ކުރުމާ ދެކޮޅަށް ސަރުކާރުން އަޅަމުންދާ ފިޔަވަޅުތަކުގެ ތެރެއިން، ސިގަރެޓާއި ބީޑީއަށް ނަގާ އިމްޕޯޓް ޑިއުޓީގެ ސްޕެސިފިކް ރޭޓް 3 ރުފިޔާއިން 8 ރުފިޔާއަށް މަތިކޮށްފައެވެ. މި ފިޔަވަޅުގެ ސަބަބުން ސިގަރެޓު ފޮށްޓެއްގެ އަގު ވަނީ ވަރަށް ބޮޑަށް އުފުލިފައެވެ.