މޯލްޑިވްސް ޕޯޓްސް ލިމިޓެޑް (އެމްޕީއެލް) އިން އުތުރުގައި ވޯޓަރ ބަންކަރިންގ ޚިދުމަތް ފޯރުކޮށްދިނުމަށް ޚާއްޞަކޮށް ތައްޔާރުކުރި އައު ފެން ބާޖު އިއްޔެ ތިލަފުށި ޑޮކްޔާޑުން މޫދަށް ބާލައިފިއެވެ. މި ބާޖަކީ 200 ޓަނުގެ ފެން ރައްކާކުރެވޭ ޚާއްޞަ އުޅަނދެކެވެ.
އެމްޕީއެލްގެ ސީއީއޯ މުޙައްމަދު ވަޖީހު އިބްރާހީމް ސޯޝަލް މީޑިއާގައި ކުރި ޕޯސްޓެއްގައި ވިދާޅުވި ގޮތުގައި، މިދިޔަ ސެޕްޓެމްބަރު 19 ގައި ފެށުނު ބަންކަރިންގ ޚިދުމަތް ފުރަތަމަ ފޯރުކޮށްދެމުން ދިޔައީ ކޮޅުވެއްޓިއެއްގައި ކަޅުހަން ބަހައްޓައިގެންނެވެ. ނަމަވެސް، އެންމެ ދެ މަސްދުވަސް ތެރޭގައި މި އައު ފެން ބާޖު ޙިދުމަތަށް ނެރެފައިވާކަން ފާހަގަކުރެއްވިއެވެ.
ވަޖީހު އިތުރަށް ވިދާޅުވި ގޮތުގައި، ކުރިއަށް އޮތް ތަނުގައި ވޯޓަރ ބަންކަރިންގ ޚިދުމަތް ފޯރުކޮށްދޭނީ މި އައު ބާޖު މެދުވެރިކޮށެވެ. އަދި އިތުރު ތަރައްޤީއެއްގެ ގޮތުގައި، ލަސްތަކެއް ނުވެ ބާޖުގައި ފެން ޕްލާންޓެއް ބަހައްޓައި، ބާޖުގައި ސީދާ ފެން އުފައްދައި ބޭނުންކުރަން ފެށޭނެ ކަމަށްވެސް އޭނާ ވިދާޅުވިއެވެ.
މި އައު ފެން ބާޖަކީ އުތުރުގައި އެމްޕީއެލްއިން ފޯރުކޮށްދޭ މެރިޓައިމް ޚިދުމަތްތަކަށް ލިބުނު އިތުރު ކުރިއެރުމެއް ކަމުގައި އެ ކުންފުނިން ވަނީ ފާހަގަކޮށްފައެވެ.