އަމިއްލަ ލޯބިވެރިޔާއަށް ބިރުދައްކައި ބްލެކްމެއިލްކުރި ކަމަށް ތުހުމަތުކުރެވޭ ފުލުހެއް ހައްޔަރުކޮށް، ބަންދަށް 3 ދުވަސް ޖަހައިފިއެވެ.
ފުލުހުން މިއަދު ހާމަކުރި މަޢުލޫމާތުގައިވާ ގޮތުން، ހައްޔަރުކުރެވުނު ފަރާތަކީ އއ. މަތިވެރި ފަޒާގޭ، 19 އަހަރުގެ ޒައިދާން މުޙައްމަދެވެ. އޭނާއަކީ އެރަށު ޕޮލިސް ސްޓޭޝަންގައި މަސައްކަތްކުރާ ރެކްރޫޓް ފުލުހެކެވެ.
މި މައްސަލައިގައި ޒައިދާން ތުހުމަތުކުރެވެނީ އޭނާގެ ލޯބިވެރިޔާގެ އޮރިޔާން ފޮޓޯތަކާއި ވީޑިއޯތައް ސޯޝަލް މީޑިއާގައި ޢާންމުކޮށްލާނެ ކަމަށް ބުނެ ބިރުދެއްކުމާއި ބްލެކްމެއިލްކުރި ކަމަށެވެ.
މި މައްސަލައިގައި ޒައިދާން ހައްޔަރުކުރެވުނީ އިއްޔެއެވެ. އަދި މިއަދު އޭނާ މަތިވެރީ މެޖިސްޓްރޭޓް ކޯޓަށް ހާޒިރުކުރުމުން، އޭނާގެ ބަންދު މުއްދަތު 3 ދުވަހަށް އިތުރުކޮށްފައިވެއެވެ.
ފުލުހުން ބުނާ ގޮތުގައި މި މައްސަލައިގެ ތަޙްޤީޤު ދަނީ ކުރިއަށެވެ.